ຂໍໃຫ້ 4 ຕົວຊີ້ວັດເພື່ອສົ່ງເສີມການທ່ອງທ່ຽວ ນະຄອນຫລວງວຽງຈັນປາກົດຜົນເປັນຈິງ

ໂດຍ: ທ່ຽງທຳ

ສະບາຍດີ ເພື່ອນຜູ້ອ່ານທີ່ຮັກແພງ, ຫລາຍຄົນກໍອາດຈະດີໃຈທີ່ນະຄອນຫລວງວຽງຈັນໄດ້ວາງ 4 ຕົວຊີ້ວັດເພື່ອສົ່ງເສີມປີທ່ອງທ່ຽວລາວໃຫ້ປະສົບຜົນສຳເລັດ ໂດຍຕົ້ນຕໍແມ່ນເລັ່ງຮັບປະກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງຕົວເມືອງ ນັບທັງຂອດຈະລາຈອນໃຫ້ສະດວກສະບາຍບໍ່ໃຫ້ມີອຸປະຕິເຫດເກີດຂຶ້ນ, ບໍ່ໃຫ້ມີອາຊະຍາກຳ, ປະຊາຊົນມີຄວາມສາມັກຄີປອງດອງ, ພ້ອມເລັ່ງປັບປຸງ ແລະ ແກ້ໄຂສະພາບອັກຄີໄພໃຫ້ມີປະສິດທິຜົນ, ສ້າງນະຄອນຫລວງວຽງຈັນໃຫ້ສະອາດຈົບງາມ, ຈັດສັນຄວາມເປັນລະບຽບຮຽບຮ້ອຍຕາມຖະໜົນຫົນທາງ ແລະ ສວນສາທາລະນະຕ່າງໆ, ຮ່ວມກັນສ້າງນະຄອນຫລວງເປັນນະຄອນສີຂຽວ ດ້ວຍການປົກປັກຮັກສາປ່າໄມ້ ແລະ ສະພາບແວດລ້ອມທີ່ດີເລີດ, ສ້າງນະຄອນຫລວງວຽງຈັນໃຫ້ເປັນນະຄອນສະຫວ່າງແຈ້ງ ໄປທາງໃດມາທາງໃດກໍໃຫ້ມີແສງໄຟສະຫວ່າງຮຸ່ງແຈ້ງ ບໍ່ໃຫ້ມືດມົນເໝືອນດັ່ງຜ່ານມາ. ພາຍຫລັງເຫັນວ່າຢູ່ໃນນະຄອນຫລວງວຽງຈັນເຮົາຍັງເຮັດວຽກງານດັ່ງກ່າວບໍ່ທັນໄດ້ດີ ໂດຍສະເພາະບັນຫາອຸປະຕິເຫດມີຂຶ້ນຈົນເປັນກະແສລາຍວັນ, ຄວາມສະອາດຂອງຕົວເມືອງຍັງເຮັດໄດ້ໜ້ອຍ, ຖະໜົນຫົນທາງເປ່ເພມີຫລາຍ ແຕ່ຍັງບໍ່ທັນໄດ້ຮັບການປົວແປງ, ສະພາບຂີ້ລັກງັດແງະ, ໄພສັງຄົມຍັງເກີດຂຶ້ນ ແລະ ກໍເປັນບັນຫາຮີບດ່ວນທີ່ນະຄອນຫລວງບ່ອນເປັນໜ້າຕາຂອງປະເທດຈະຕ້ອງໄດ້ເລັ່ງປັບປຸງແກ້ໄຂ ແລະ ເຮັດໃຫ້ຕົວຊີ້ວັດດັ່ງກ່າວປາກົດຜົນເປັນຈິງ ເພື່ອຮອງຮັບປີທ່ອງທ່ຽວລາວມີຜົນສຳເລັດ ແຂກໄປໄທມາໃຜໆກໍຍົກຍ້ອງປະທັບໃຈ.