ເດືອນ ເມສາ ຜ່ານມາ ສປປ ລາວ ຂາດດຸນການຄ້າ 198 ລ້ານໂດລາ

ສູນຂໍ້ມູນຂ່າວສານທາງດ້ານການຄ້າ ລາຍງານວ່າ:  ມູນຄ່າການນໍາເຂົ້າ ແລະ ສົ່ງອອກສິນຄ້າ ຂອງ ລາວ ປະຈໍາເດືອນ ເມສາ 2024 ບັນລຸໄດ້ 1,122 ລ້ານໂດລາສະຫະລັດ, ທຽບໃສ່ເດືອນມີນາຜ່ານມາ ແມ່ນຫລຸດລົງປະມານ 13%. ໃນນີ້, ມູນຄ່າສົ່ງອອກບັນລຸໄດ້ 462 ລ້ານໂດລາ, ຫລຸດລົງ 20% ແລະ ມູນຄ່ານໍາເຂົ້າ ບັນລຸໄດ້ 660 ລ້ານໂດລາ, ຫລຸດລົງ 2%. ທັງໝົດນີ້ ແມ່ນຍັງບໍ່ໄດ້ລວມເອົາມູນຄ່າການນໍາເຂົ້າ ແລະ ສົ່ງອອກ ໄຟຟ້າ

ສິນຄ້າທີ່ສົ່ງອອກ 5 ອັນດັບຕົ້ນຕໍ ປະກອບມີ: ເກືອກາລີ, ຄໍາປະສົມ, ແຮ່ທອງ, ມັນຕົ້ນ ແລະ ນໍ້າຕານ; ສ່ວນສິນຄ້າທີ່ນໍາເຂົ້າ 5 ອັນດັບຕົ້ນຕໍ ປະກອບມີ: ນໍ້າມັນກາຊວນ, ພາຫະນະທາງບົກ, ອຸປະກອນກົນຈັກ, ເຫຼັກ ແລະ ເຄື່ອງໃຊ້ທີ່ເຮັດດ້ວຍພລາສະຕິກ.

ສຳລັບປະເທດສົ່ງອອກ 5 ອັນດັບ ຕົ້ນຕໍ ມີ: ຫວຽດນາມ, ຈີນ, ໄທ, ອົດສະຕາລີ ແລະ ສະວິດເຊີແລນ; ປະເທດນໍາເຂົ້າ 5 ອັນດັບ ຕົ້ນຕໍ ມີ: ໄທ, ຈີນ, ຫວຽດນາມ, ສ.ອາເມລິກາ ແລະ ສ.ເກົາຫລີ.