UNSC ມີມະຕິສະໜັບສະໜູນແຜນຢຸດຍິງຢູ່ເຂດກາຊາທີ່ອາເມລິກາສະເໜີ
ສະມາຊິກສະພາຄວາມໝັ້ນຄົງແຫ່ງສະຫະປະຊາຊາດ (UNSC) 14 ຈາກ 15 ປະເທດ ມີມະຕິສະໜັບສະໜູນຂໍ້ສະເໜີຢຸດຍິງລະຫວ່າງອິດສະລາແອນ ແລະ ຮາມາດຢູ່ເຂດກາຊາທີ່ສະເໜີໂດຍອາເມລິກາ ໂດຍມີເງື່ອນໄຂຫລັກຄື: ການຢຸດຍິງຢ່າງສົມບູນ ແລະ ເຕັມຮູບແບບ ແລະ ການປ່ອຍຕົວປະກັນທີ່ຮາມັດຄວບຄຸມໄວ້ ລວມທັງສົ່ງຄືນສົບຕົວປະກັນທີ່ເສຍຊີວິດ ແລະ ການແລກປ່ຽນນັກໂທດຊາວປາແລັສຕິນທີ່ຖືກກັກຂັງຢູ່ຄຸກອິດສະລາແອນ.
ມະຕິດັ່ງກ່າວລະບຸວ່າ: ອິດສະລາແອນໄດ້ຍອມຮັບຂໍ້ສະເໜີຢຸດຍິງແລ້ວ, ພ້ອມຮຽກຮ້ອງໃຫ້ກຸ່ມຮາມັດຍອມຮັບນໍາເຊັ່ນກັນ ໂດຍສະພາຄວາມໝັ້ນຄົງຈະຮ່ວມມືກັບລັດຖະບານຫລາຍປະເທດ ລວມທັງກຸ່ມ G7 ໃນການສະໜັບສະໜູນແຜນຢຸດຍິງ ເຊິ່ງມີທັງໝົດ 3 ໄລຍະ ແບ່ງເປັນໄລຍະທີ 1: ການແລກປ່ຽນຕົວປະກັນຢູ່ກາຊາກັບນັກໂທດປາແລັສຕິນ ແລະ ການຢຸດຍິງໄລຍະສັ້ນ; ໄລຍະທີ 2: ການຢຸດເປັນສັດຕູຢ່າງຖາວອນ ແລະ ຖອນກໍາລັງທະຫານອິດສະລາແອນອອກຈາກເຂດກາຊາໂດຍສົມບູນ; ໄລຍະທີ 3: ພາບລວມໄລຍະຍາວຂອງເຂດກາຊາ ແລະ ການເລີ່ມຕົ້ນຟື້ນຟູກາຊາທີ່ອາດໃຊ້ເວລາຫລາຍປີ.
ປະທານາທິບໍດີ ໂຈ ໄບເດນ ໄດ້ເປີດເຜີຍຂໍ້ສະເໜີຢຸດຍິງດັ່ງກ່າວນັບແຕ່ວັນທີ 31 ພຶດສະພາຜ່ານມາ ທ່າມກາງສະຖານະການຢູ່ເຂດກາຊາທີ່ທະວີຄວາມເຄັ່ງຕຶງຈາກການເດີນໜ້າປະຕິບັດການໂຈມຕີຂອງອິດສະລາແອນ.
ໂດຍທ່ານ ໄບເດນ ເປີດເຜີຍວ່າ: ອິດສະລາແອນເຫັນພ້ອມຕໍ່ແຜນດັ່ງກ່າວ, ແຕ່ນາຍົກລັດຖະມົນຕີ ເບນຈາມິນ ເນທັນຢາຮູ ຍັງບໍ່ໄດ້ໃຫ້ການຮັບຮອງໃນຂໍ້ສະເໜີຢຸດຍິງ.
ອ້າງອີງ:
