Singapore Airlines ຈ່າຍ 10,000-25,000 ໂດລາ ຊົດເຊີຍຜູ້ບາດເຈັບເຮືອບິນຕົກຫລຸມອາກາດ
ສາຍການບິນ Singapore Airlines ອອກມາສະແດງຄວາມຂໍໂທດ ພ້ອມປະກາດສະເໜີເງິນຊົດເຊີຍຜູ້ໂດຍສານຖ້ຽວບິນ SQ321 ທີ່ໄດ້ຮັບຜົນກະທົບຈາກເຮືອບິນຕົກຫລຸມອາກາດຮຸນແຮງ ລະຫວ່າງເດີນທາງຈາກນະຄອນຫລວງລອນດອນໄປສິງກະໂປ ໃນວັນທີ 20 ພຶດສະພາຜ່ານມາ ຈົນຕ້ອງລົງຈອດສຸກເສີນຢູ່ສະໜາມບິນສຸວັນນະພູມ.
ເຫດການທີ່ເກີດຂຶ້ນສົ່ງຜົນເຮັດໃຫ້ມີຜູ້ໂດຍສານຊາວອັງກິດ ອາຍຸ 73 ປີ ເສຍຊີວິດ 1 ຄົນ ແລະ ມີຜູ້ບາດເຈັບອີກຫລາຍສິບຄົນ ເຊິ່ງບາງຄົນອາການສາຫັດ.
ຂະນະທີ່ສາຍການບິນໄດ້ສົ່ງຂໍ້ສະເໜີຊົດເຊີຍໃຫ້ຜູ້ໂດຍສານທຸກຄົນໃນວັນທີ 10 ມິຖຸນາ ເຊິ່ງຜູ້ທີ່ໄດ້ຮັບບາດເຈັບເລັກໜ້ອຍຈະໄດ້ຮັບເງິນຊົດເຊີຍ 10,000 ໂດລາ.
ສໍາລັບຜູ້ໂດຍສານທີ່ໄດ້ຮັບການປະເມີນທາງການແພດວ່າໄດ້ຮັບບາດເຈັບສາຫັດ ແລະ ຕ້ອງໄດ້ຮັບການເບິ່ງແຍງຮັກສາທາງການແພດໃນໄລຍະຍາວ ຈະໄດ້ຮັບເງິນຊົດເຊີຍຈໍານວນ 25,000 ໂດລາ, ສ່ວນຜູ້ໂດຍສານທີ່ບໍ່ໄດ້ຮັບບາດເຈັບໃດໆຈະໄດ້ຮັບເງິນຊົດເຊີຍຄວາມຊັກຊ້າຕາມກົດລະບຽບຂອງສະຫະພາບເອີຣົບ ຫລື ອັງກິດ.
ທັງນີ້, ສາຍການບິນເປີດເຜີຍວ່າ: ໄດ້ຮັບຜິດຊອບຄ່າໃຊ້ຈ່າຍໃນການປິ່ນປົວຜູ້ໂດຍສານທີ່ບາດເຈັບທັງໝົດ ລວມທັງຈັດການໃຫ້ສະມາຊິກຄອບຄົວຂອງຜູ້ບາດເຈັບໄດ້ເດີນທາງມາຢາມຢູ່ນະຄອນຫລວງບາງກອກ.
ນອກຈາກນີ້, ຜູ້ໂດຍສານຖ້ຽວບິນ SQ321 ທຸກຄົນ ຈະໄດ້ຮັບຄືນເງິນຄ່າປີ້ເຕັມຈໍານວນ ເຊິ່ງທາງສາຍການບິນຍັງມອບເງິນໃຫ້ຜູ້ໂດຍສານທຸກຄົນ ຄົນລະ 1,000 ໂດລາສິງກະໂປ ເພື່ອເປັນຄ່າໃຊ້ຈ່າຍເມື່ອເດີນທາງອອກຈາກນະຄອນຫລວງບາງກອກ.
ອ້າງອີງ:
