ນາຍົກລັດຖະມົນຕີແບນຊິກ ປະກາດກຽມລາອອກ ຫລັງພັກເສຍໄຊເລືອກຕັ້ງສໍາຄັນ
ທ່ານ ອາເລັກຊານເດີ ເດິ ຄຣູ ນາຍົກລັດຖະມົນຕີແບນຊິກ ປະກາດກຽມລາອອກຈາກຕໍາແໜ່ງ ຫລັງພັກຮ່ວມລັດຖະບານ ຄືພັກ Open Vld ຂອງທ່ານສ້າງຜົນງານໄດ້ໜ້າຜິດຫວັງໃນການເລືອກຕັ້ງສໍາຄັນວັນທີ 9 ມິຖຸນາຜ່ານມາ ໂດຍໄດ້ຮັບຄະແນນສຽງພຽງ 5.69% ເທົ່ານັ້ນ ແລະ ເຮັດໃຫ້ພັກມີບ່ອນນັ່ງໃນສະພາເຫລືອພຽງ 7 ບ່ອນນັ່ງ ຫລຸດລົງຈາກການເລືອກຕັ້ງໃນປີ 2019 ທີ່ເຄີຍໄດ້ຮັບບ່ອນນັ່ງໃນສະພາໄປ 12 ບ່ອນນັ່ງ.
ຂະນະທີ່ພັກ N-VA ເຊິ່ງເປັນພັກຜູ້ນໍາຝ່າຍຄ້ານໃນຕອນນີ້ ຍັງເປັນພັກທີ່ໄດ້ບ່ອນນັ່ງໃນສະພາແບນຊິກຫລາຍທີ່ສຸດ 24 ຈາກ 150 ບ່ອນນັ່ງ ເຊິ່ງຄາດວ່າຈະເປັນພັກທີ່ໄດ້ຮັບສິດຈັດຕັ້ງລັດຖະບານປະສົມຊຸດຕໍ່ໄປເປັນພັກການເມືອງທໍາອິດ ໂດຍມີພັກຝ່າຍຂວາຈັດ ຄືພັກ Vlaams Belang ຕາມມາເປັນອັນດັບ 2 ມີທັງໝົດ 20 ບ່ອນນັ່ງ, ສ່ວນພັກ Socialist Party (PS) ເຊິ່ງເປັນແກນນໍາໃນການຈັດຕັ້ງລັດຖະບານປະສົມຊຸດປັດຈຸບັນ ຕົກໄປຢູ່ອັນດັບ 4 ມີທັງໝົດ 16 ບ່ອນນັ່ງ.
ຫລາຍຝ່າຍຄາດຄະເນວ່າ: ທ່ານ ເດິ ຄຣູ ຈະຍັງດໍາລົງຕໍາແໜ່ງຫົວໜ້າລັດຖະບານແບນຊິກຕໍ່ໄປອີກໄລຍະໜຶ່ງ ຈົນກວ່າຈະມີການຈັດຕັ້ງຄະນະລັດຖະບານປະສົມຊຸດໃໝ່ ໂດຍແບນຊິກຈະຍັງເປັນປະທານສະພາແຫ່ງສະຫະພາບເອີຣົບຕໍ່ໄປຈົນຮອດວັນທີ 30 ມິຖຸນານີ້ ກ່ອນຈະສົ່ງຕໍ່ໃຫ້ຜູ້ນໍາຮົງກາລີ ເຊິ່ງຈະປ່ຽນໝູນວຽນກັນໄປທຸກໆ 6 ເດືອນ.
ທ່ານ ເດິ ຄຣູ ຖືເປັນໜຶ່ງໃນຜູ້ນໍາເອີຣົບທີ່ສະແດງຈຸດຢືນຕໍ່ຕ້ານການເຮັດສົງຄາມຢູ່ເຂດກາຊາ, ພ້ອມຮຽກຮ້ອງໃຫ້ທຸກຝ່າຍຢຸດການໂຈມຕີໃສ່ພື້ນທີ່ຂອງພົນລະເຮືອນ ເຮັດໃຫ້ທ່ານມັກຈະໄດ້ຮັບສຽງວິພາກວິຈານຈາກຜູ້ນໍາ ແລະ ຝ່າຍສະໜັບສະໜູນອິດສະລາແອນເລື້ອຍໆ. ທັງຍັງສະໜັບສະໜູນອູແກຣນໃນສົງຄາມສູ້ຮົບກັບມະຫາອໍານາດຄືຣັດເຊຍ.
ອ້າງອີງ:
- https://www.aa.com.tr/en/europe/belgian-premier-announces-resignation-after-his-party-s-defeat-in-eu-elections/3245143
- https://www.theguardian.com/world/article/2024/jun/10/belgium-general-election-2024-pm-prime-minister-alexander-de-croo-set-to-resign
