ທ່ານ ມາຄຣົງ ຍຸບສະພາ ຫລັງລັດຖະບານຝຣັ່ງເສຍໄຊການເລືອກຕັ້ງລະດັບເອີຣົບ

     ຜູ້ນໍາຝຣັ່ງປະກາດຍຸບສະພາຜູ້ແທນລາຊະດອນ ໂດຍໃຫ້ມີການເລືອກຕັ້ງໃໝ່ທ້າຍເດືອນນີ້ ຫລັງລັດຖະບານສ້າງຜົນງານໄດ້ບໍ່ດີໃນການເລືອກຕັ້ງສະມາຊິກສະພາເອີຣົບ ໂດຍການປະລາໄຊໃຫ້ພັກຂວາຈັດ.

     ວັນທີ 10 ມິຖຸນາ, ສໍານັກຂ່າວຕ່າງປະເທດລາຍງານວ່າ: ປະທານາທິບໍດີ ເອັມມານູເອລ ມາຄຣົງ ຜູ້ນໍາຝຣັ່ງ ຖະແຫລງຜ່ານສະຖານີໂທລະພາບແຫ່ງຊາດ ໃນວັນທີ 9 ມິຖຸນາຜ່ານມາ ຍຸບສະພາຜູ້ແທນລາຊະດອນ ແລະ ກຽມຈັດການເລືອກຕັ້ງໃໝ່ກ່ອນກໍານົດສໍາລັບຝ່າຍນິຕິບັນຍັດ 577 ບ່ອນນັ່ງ ໃນວັນທີ 30 ມິຖຸນານີ້ ແລະ ຮອບສອງໃນວັນທີ 7 ກໍລະກົດ ສໍາລັບເຂດເລືອກຕັ້ງທີ່ບໍ່ມີຜູ້ສະໝັກທ່ານໃດໄດ້ຮັບສຽງສະໜັບສະໜູນຂາດລອຍ.

      ທັງນີ້, ທ່ານ ມາຄຣົງ ໃຫ້ເຫດຜົນແບບກົງໄປກົງມາ ກ່ຽວກັບການຕັດສິນໃຈຍຸບສະພາຄັ້ງນີ້ວ່າ: ກ່ຽວຂ້ອງກັບຜົນການເລືອກຕັ້ງສະມາຊິກສະພາເອີຣົບ ເຊິ່ງຜົນຄະແນນທີ່ອອກມາ “ບໍ່ດີຕາມການຄາດຄະເນໄວ້ສໍາລັບຜູ້ທີ່ເປັນຝ່າຍຕ້ອງປົກປ້ອງເອີຣົບ” ແລະ ເຕືອນວ່າ: ອະນາຄົດຂອງເອີຣົບ “ສ່ຽງຈະຖືກປິດກັ້ນ” ຈາກການທີ່ເອັກຊິດໂພລຂອງການເລືອກຕັ້ງສະມາຊິກສະພາເອີຣົບໃນຫລາຍປະເທດເປັນໄປໃນທາງດຽວກັນ ຄືພັກການເມືອງຂວາຈັດໄດ້ຮັບຄວາມນິຍົມເພີ່ມຂຶ້ນຫລາຍ.

      ຜົນບໍ່ເປັນທາງການຂອງການເລືອກຕັ້ງສະມາຊິກສະພາເອີຣົບ ສ່ວນຂອງຝຣັ່ງ ເຊິ່ງເປັນການເລືອກຕັ້ງ 81 ຈາກ 720 ບ່ອນນັ່ງ ປາກົດວ່າ: ພັກແນວຮ່ວມຊາດ (RN) ເຊິ່ງເປັນພັກການເມືອງຝ່າຍຂວາຈັດຂອງນາງ ມາຣີນ ເລີ ແປນ ອາດໄດ້ບ່ອນນັ່ງເກືອບ 40%.

      ທ່ານ ມາຄຣົງ ປະນາມຝ່າຍຂວາຈັດ ລະ ນາງ ເລີ ແປນ “ນໍາເອົາຄວາມທຸກຍາກກັບມາສູ່ເອີຣົບ” ແລະ “ທໍາລາຍພາບພົດ” ຂອງປະເທດ. ດັ່ງນັ້ນ ໃນຖານະຜູ້ນໍາຝຣັ່ງ ທ່ານບໍ່ອາດເມີນເສີຍຕໍ່ສະຖານະການທີ່ເກີດຂຶ້ນໄດ້ ແລະ ຂໍໃຫ້ປະຊາຊົນຕັດສິນໃຈຜ່ານການເລືອກຕັ້ງຄັ້ງໃໝ່ພາຍໃນປະເທດ ໂດຍຂໍໃຫ້ “ຊາວຝຣັ່ງຜູ້ຮັກຊາດ” ອອກມາສະແດງອອກຮ່ວມກັນ.