ເຈົ້າໜ້າທີ່ພາສີສະໜາມບິນວັດໄຕຢຶດ ນໍແຮດ ມີ ນ້ຳໜັກກວ່າ 11 ກິໂລ
ເຈົ້າໜ້າທີ່ພາສີ ປະຈຳດ່ານສາກົນວັດໄຕຮ່ວມກັບເຈົ້າໜ້າທີ່ປ່າໄມ້, ປກສ, ສາມາດຢຶດ ນໍແຮດ ຈາກຊາວຈີນ 2 ຄົນ ທີ່ນ້ຳເຂົ້າມາ ສປປ ລາວ ໂດຍຜ່ານສາຍການບິນ silkair ລວມມີນ້ຳຫນັກ 11 ກິໂລກຣາມ, ຄິດເປັນມູນຄ່າເບື້ອງຕົ້ນເກືອບ 2 ແສນໂດສະຫະລັດ.
ທ່ານ ບົວສອນ ໄຊຍະສຸກ ຫົວໜ້າດ່ານພາສີສາກົນ ສະໜາມບິນວັດໄຕ ຖະແຫລ່ງວ່າ: ໃນຕອນຄໍ່າຂອງວັນທີ 23 ຕຸລານີ້ ໂດຍໄດ້ຮັບການລາຍງານວ່າຈະມີການລັກລອບນໍາເຂົ້າສິ່ງຜິດກົດໝາຍປະເພດ ນໍແຮດ ໂດຍຜ່ານສາຍການບິນ silk airline ຖ້ຽວບິນ MI 788 ເຊິ່ງຕົ້ນທາງມາຈາກສິງກະໂປ ໂດຍຜ່ານສະໜາມບິນສາກົນວັດໄຕເພື່ອມີຈຸດຫມາຍປາຍທາງທີ່ແຂວງຫລວງພະບາງ ດັ່ງນັ້ນ, ເຈົ້າໜ້າທີ່ພາສີ ຈຶ່ງໄດ້ປະສານສົມທົບກັບບັນດາພາກສ່ວນກ່ຽວຂ້ອງຕິດຕາມຢ່າງໃກ້ຊິດພາຍຫລັງເຄື່ອງບິນມາຮອດສະໜາມບິນສາກົນວັດໄຕ, ຈິ່ງໄດ້ພົບຜູ້ຕ້ອງສົງໃສຈຳນວນ 2 ຄົນ (ສັນຊາດຈີນ) ຜ່ານການກວດກາ ແລະ ສືບສວນສອບສວນເບື້ອງຕົ້ນຜູ້ຕ້ອງຫາ ແລະ ໄດ້ທຳການກວດຄົ້ນກະເປົາພົບເຫັນສິ່ງຂອງຜິດກົດໝາຍປະເພດ ນໍແຮດ ຈຳນວນ 5 ອັນລວມນ້ຳໜັກ 11.10 ກິໂລກະຣາມ ແລະ ຈາກການປະເມີນມູນຄ່າເບື້ອງຕົ້ນຂອງອົງການສັດນ້ຳ-ສັດປ່າສາກົນ, ນໍແຮດ ດັ່ງກ່າວນີ້ມີມູນຄ່າ 1 ກິໂລເທົ່າກັບ 16.000 ໂດລາສະຫະລັດ.
ປັດຈຸບັນທາງເຈົ້າໜ້າພາສີສາກົນ ປະຈຳສະໜາມບິນວັດໄຕ ໄດ້ຢຶດຂອງກາງດັ່ງກ່າວ ແລະ ກັກຕົວຜູ້ຕ້ອງຫາພ້ອມທັງໄດ້ມອບໃຫ້ເຈົ້າໜ້າທີ່ຕໍາຫລວດສິ່ງແວດລ້ອມ ກະຊວງ ປກສ ເພື່ອທຳການສືບສວນ-ສອບສວນຕາມລະບຽບການ ເພື່ອທໍາການສືບສວນ-ສອບສວນຫາຜູ້ຮ່ວມຂະບວນການມາດໍາເນີນຄະດີຕາມລະບຽບກົດຫມາຍ ແລະ ຂະຫຍາຍຜົນຫາຜູ້ຮ່ວມຂະບວນການມາດຳ ເນີນຄະດີຕໍ່ໄປ.
ສ່ວນ ນໍແຮດ ທາງເຈົ້າໜ້າພາສີສາກົນສະໜາມບິນວັດໄຕ ໄດ້ຢຶດເປັນການຊົ່ວຄາວເພື່ອທຳການສືບສ່ວນສອບສ່ວນ ແລະ ພາຍຫລັງສຳເລັດການດຳເນີນຄະດີທາງພາສີແລ້ວຈະໄດ້ມອບຂອງກາງຈຳນວນດັ່ງກ່າວໃຫ້ພາກສ່ວນກ່ຽວຂ້ອງດຳເນີນການໃນຂັ້ນຕອນຕໍ່ໄປຕາມລະບຽບກົດໝາຍ.
ພາບ-ຂ່າວ: ນັກຂ່າວກະຊວງການເງິນ
