ປກສ ເມືອງລອງ ກັກຜູ້ຄ້າຂາຍ ແລະ ເສບຢາເສບຕິດ 6 ຄົນ ພ້ອມຂອງກາງຢາບ້າ
June 7, 2024 - 11:14 AM
ຂ່າວ ປກສ ແຂວງຫລວງນ້ຳທາ ລາຍງານ ວັນທີ 5 ມິຖຸນາ 2024 ວ່າ: ໃນໄລຍະ 1 ເດືອນຜ່ານມາ ປກສ ເມືອງລອງ ໄດ້ເອົາໃຈໃສ່ຕິດຕາມກຸ່ມເປົ້າໝາຍຢາເສບຕິດ ສາມາດກັກຜູ້ຖືກຫາໄດ້ 6 ຄົນ ຄື: ທ້າວ ລີທໍ່ ອາຍຸ 44 ປີ ບ້ານພີນຫໍ້, ທ້າວ ກາແປວ ອາຍຸ 57 ປີ ບ້ານຕີນດອຍ, ທ້າວ ເຢັງເຮີ ອາຍຸ 16 ປີ ແລະ ນາງ ໄມ ອາຍຸ 50 ປີ ຢູ່ບ້ານແດນກາງ, ທ້າວ ໄມຄຳ ອາຍຸ 40 ປີ ແລະ ນາງ ແສງ ອາຍຸ 35 ປີ ຢູ່ບ້ານສະເກົ່າ ຜູ້ຖືກຫາທັງ 6 ຄົນ ແມ່ນຢູ່ ເມືອງລອງ ແຂວງຫລວງນໍ້າທາ. ພ້ອມຢຶດຂອງກາງຢາບ້າ 2.840 ເມັດ.
ຜ່ານການສອບສວນຂອງເຈົ້າໜ້າທີ່ ພວກກ່ຽວຮັບສາລະພາບວ່າ: ຢາເສບຕິດຈໍານວນດັ່ງກ່າວ ແມ່ນຂອງພວກກ່ຽວແທ້ ແລະ ໄລຍະຜ່ານມາໄດ້ເຄື່ອນໄຫວພົວພັນ ຊື້-ຂາຍນຳຄູ່ຮ່ວມຂະບວນການດຽວກັນ, ເຊິ່ງຢາບ້າທີ່ຊື້ມານັ້ນ ເພື່ອນໍາມາເສບ ແລະ ຂາຍຍ່ອຍໃຫ້ກຸ່ມໄວໜຸ່ມ ຢູ່ພາຍໃນບ້ານ. ປັດຈຸບັນເຈົ້າໜ້າທີ່ໄດ້ດຳເນີນຄະດີຕາມລະບຽບກົດໝາຍ.
