ເຈົ້າແຂວງໄຊສົມບູນ ລົງກວດກາ ແລະ ຊຸກຍູ້ ໂຄງການຂຸດຄົ້ນ ແລະ ປຸງແຕ່ງແຮ່ຄຳ ຢູ່ເມືອງອະນຸວົງ

ວັນທີ 5 ມິຖຸນາ 2024, ທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ ພ້ອມດ້ວຍຄະນະ ໄດ້ລົງຊຸກຍູ້, ຕິດຕາມ, ກວດກາ ໂຄງການຂຸດຄົ້ນ ແລະ ປຸງແຕ່ງແຮ່ຄຳ ຂອງບໍລິສັດ ຮ່ວມມືພັດທະນາບໍ່ແຮ່ ໄຊສົມບູນ ຈຳກັດ ຢູ່ເມືອງອະນຸວົງ ແຂວງໄຊສົມບູນ.

ຜູ້ອຳນວຍການ ບໍລິສັດ ລາຍງານວ່າ: ໂຄງການຂຸດຄົ້ນ ແລະ ປຸງແຕ່ງແຮ່ຄຳ ດັ່ງກ່າວ ໄດ້ທົດລອງເຄື່ອງຈັກມາແຕ່ເດືອນ ເມສາ ຈົນຮອດທ້າຍປີ 2023 ແລະ ໄດ້ທຳການຜະລິດ (ຊົ່ວໂມງເຮັດວຽກຕົວຈິງ) ແມ່ນ 1.700 ກວ່າຊົ່ວໂມງ ແລະ ໄດ້ປ່ອນແຮ່ເຂົ້າທັງໝົດ 50 ພັນກວ່າໂຕນ. ໃນປີ 2024 ໄດ້ເລີ່ມແຕ່ເດືອນມັງກອນ-ເດືອນເມສາ ໄດ້ປ່ອນແຮ່ເຂົ້າທັງໝົດ 23 ພັນກວ່າໂຕນ, ເຊິ່ງນັບແຕ່ມື້ຕິດຕັ້ງເຄື່ອງສຳເລັດ ແລະ ເລີ່ມທົດລອງມາຮອດເດືອນ ເມສາ 2024 ນີ້ ຄາດວ່າຈະໄດ້ແຮ່ຄຳຢູ່ 33 ພັນກວ່າກິໂລກຣາມ, ສະເພາະເດືອນພຶດສະພາ ນັບແຕ່ວັນທີ 1 ເປັນຕົ້ນມາ ມື້ເຮັດວຽກຕົວຈິງແມ່ນ 300 ກວ່າຊົ່ວໂມງ ໄດ້ເອົາແຮ່ເຂົ້າທັງໝົດ 10.240 ກວ່າໂຕນ ຄາດວ່າຈະໄດ້ແຮ່ຄຳອອກມາ 4 ພັນກວ່າກຣາມ ເກືອບ 5 ກິໂລກຣາມ.

ການລົງເຄື່ອນໄຫວຢ້ຽມຢາມຄັ້ງນີ້ ເປັນການຊຸກຍູ້, ຕິດຕາມ, ກວດກາ ໂຄງການດັ່ງກ່າວ ພ້ອມທັງເປັນການປຶກສາຫາລື ຖອດຖອນບົດຮຽນ ຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆ ເພື່ອພ້ອມກັນຊອກຫາວິທີທາງແກ້ໄຂ ໃນສະເພາະໜ້າ ແລະ ຍາວນານ ເພື່ອຮັບປະກັນໃຫ້ໂຄງການໄດ້ດຳເນີນໄປດ້ວຍຄວາມຖືກຕ້ອງຕາມຂັ້ນຕອນ ແລະ ລະບຽບຫລັກການ ໃຫ້ມີຄວາມໂປ່ງໃສ ແລະ ສາມາດກວດສອບໄດ້ ໃນແຕ່ລະໄລຍະ ຂອງການຂຸດຄົ້ນ ດ້ວຍຄວາມເປັນທຳ.