IS ສັງຫານພົນລະເຮືອນຢູ່ຊີຣີ
ນັກຮົບກຸ່ມ IS ຢູ່ຊີຣີສັງຫານພົນລະເຮືອນທີ່ຕ້ອງສົງໄສເປັນສາຍໃຫ້ກອງທັບລັດຖະບານ ຢ່າງໜ້ອຍ 128 ຄົນ ຢູ່ເມືອງກໍຢາເຕນ ທາງພາກກາງ ໃນໄລຍະ 3 ອາທິດ ກ່ອນເມືອງຈະຖືກທະຫານບຸກຍຶດຄືນໃນວັນທີ 21 ຕຸລາ.
ສຳນັກຂ່າວຣອຍເຕີ, ເອພີ ແລະ ເອເອຟພີ ລາຍງານຈາກນະຄອນຫລວງເບຣຸດ ປະເທດລີບັງ ໃນວັນທີ 23 ຕຸລາວ່າ: ທ່ານ ຣາມີ ອັບເດລ ຣາມານ ຫົວໜ້າສູນສັງເກດການສິດທິມະນຸດຊີຣີ (SOHR) ເປີດເຜີຍໃນວັນທີ 23 ຕຸລາວ່າ: ກອງທັບລັດຖະບານຊີຣີ ແລະ ກອງກຳລັງພັນທະມິດບຸກຍຶດເມືອງກໍຢາເຕນ ແຂວງຮອມ ທາງພາກກາງ ຄືນຈາກກຸ່ມ IS ໄດ້ໃນວັນທີ 21 ຕຸລາ ຈາກການກວດສະພາບເມືອງພົບສົບພົນລະເຮືອນທີ່ຖືກນັກຮົບ IS ສັງຫານກ່ອນເສຍເມືອງ ຢ່າງໜ້ອຍ 128 ຄົນຕາມຈຸດຕ່າງໆຂອງເມືອງ ແລະ ຈາກການເປີດເຜີຍຂອງປະຊາຊົນພາຍໃນເມືອງທີ່ເຫັນເຫດການລະບຸວ່າ: ກຸ່ມຄົນເຫລົ່ານີ້ຖືກສົງໄສວ່າເປັນສາຍລັບໃຫ້ທະຫານກອງທັບຊີຣີ.
