ເລີ່ມຕັດທາງເບຕົງ ຢູ່ເສັ້ນທາງ ຫົວຂົວ – ໂນນສະຫວ່າງ ເພື່ອແກ້ບັນຫານ້ຳເປື້ອນໃນຕົວເມືອງ

ທ່ານ ສົມໃຈຫວັງ ເດດອຸດົມ ຮອງຫົວໜ້າພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນ ໃຫ້ສຳພາດຕໍ່ສື່ມວນຊົນກ່ຽວກັບໂຄງການບຳບັດນ້ຳເປື້ອນ ຢູ່ນະຄອນຫລວງວຽງຈັນ ວ່າ: ການກໍ່ສ້າງໂຄງການດັ່ງກ່າວນີ້ແມ່ນແບ່ງເປັນ 2 ຕອນຄື: ຈຸດຕໍ່ໜ້າຮ້ານເຝີຕົ້ນຕານ ແລະ ຈຸດທາງຮ່ອມເຂົ້າ ບ້ານ ໂຊກຄໍາ, (ຈາກເຝີຕົ້ນຕານ ຫາ ບ້ານ ໂນນຄໍ້ໃຕ້) ເມືອງ ໄຊເສດຖາ ນະຄອນຫລວງວຽງຈັນ, ການກໍ່ສ້າງເລີ່ແຕ່ ວັນທີ 29 ພຶດສະພາ ຫາ ວັນທີ 21 ມິຖຸນາ 2024ນີ້ໃຫ້ສຳເລັດ, ລວມທັງໝົດ ໃຊ້ເວລາ 24 ວັນ ເພື່ອວາງທໍ່ແຮງດັນສູງຂະໜາດທໍ່ 80 ຊັງຕີແມັດ.

ສະນັ້ນ, ຈຶ່ງຮຽກຮ້ອງ ແລະ ຂໍຄວາມຮ່ວມມືມາຍັງປະຊາຊົນ, ອໍານາດການປົກຄອງບ້ານ ແລະ ບັນດາຜູ້ຂັບຂີ່ລົດປະເພດຕ່າງໆ ຖ້າບໍ່ຈໍາເປັນໃຫ້ຫລີກລ່ຽງການນຳໃຊ້ເສັ້ນທາງດັ່ງກ່າວ, ໂດຍສະເພາະລົດບັນທຸກທີ່ມີນ້ຳໜັກເກີນ 5 ໂຕນ ໃນໄລຍະເວລາທີ່ກຳນົດດ້ວຍ ເພື່ອເຮັດໃຫ້ການກໍ່ສ້າງດໍາເນີນໄປດ້ວຍດີ ແລະ ສໍາເລັດຕາມແຜນການທີ່ວາງໄວ້.

ຂໍ້ມູນ: ວິທະຍຸແຫ່ງຊາດ