ລະວັງຕົກເປັນເຫຍື່ອຂອງກຸ່ມຄ້າມະນຸດ ໃນຮູບການຈ້າງໃຫ້ອູ້ມບຸນ ຫລື ການຖືພາແທນ
ວັນທີ 19 ພຶດສະພາ 2024 ຜ່ານມາໄດ້ມີຜູ້ໃຊ້ເຟສບຸກຊື່: Wikanda Rueangroj ໄດ້ໂພສປະກາດຕ້ອງການຜູ້ຍິງມາອູ້ມບຸນ ຫລື ຈ້າງໃຫ້ຖືກພາ ພ້ອມສະເໜີຄ່າທຳຂວັນ ຫລື ຄ່າຈ້າງ 100 ລ້ານກີບ ຕໍ່ລູກໜຶ່ງຄົນ.
ທີມງານໜັງສືພິມ ລາວພັດທະນາ ໄດ້ທົດລອງໂທຖາມເບີ 020 5751 4832 ທີ່ປະກາດໄວ້ ໄດ້ຄຳຕອບວ່າ ຜູ້ກ່ຽວຕ້ອງຜູ້ຍິງອາຍຸ 18-35 ປີ ເບື້ອງຕົ້ນຈະພາໄປກວດສຸຂະພາບຢູ່ຄລີນິກແຫ່ງໜຶ່ງ ຖ້າຜົນກວດອອກມາຜ່ານແມ່ນຈະເຮັດສັນຍາຈ່າຍໃຫ້ກ່ອນ10 ລ້ານ ຫລັງຈາກນັ້ນຈະພາໄປ ບໍ່ເຕັນ ແຂວງຫລວງນໍ້າທາ ໃຫ້ໄປຢູ່ຫໍພັກທີ່ກຽມໄວ້ໃຫ້ສະເພາະ ແລະ ຈະລ້ຽງອາຫານການກິນ 3 ຄາບຕໍ່ມື້ ນັບແຕ່ມື້ເລີ່ມຖືພາຈົນຮອດມື້ເກີດ ໄລຍະຖືພາແມ່ນຈະໄດ້ເງິນ 5 ລ້ານກີບຕໍ່ເດືອນ. ລວມຖືພາ 9 ເດືອນຈະຕົກຢູ່ 45 ລ້ານ ແລ້ວບວກໃສ່ 10ລ້ານ ທີ່ຈ່າຍກ່ອນມື້ເຮັດສັນຍາລວມເປັນ 55 ລ້ານກີບ. ຫລັງເກີດລູກແລ້ວຈະຈ່າຍເພີ່ມສ່ວນທີ່ເຫລືອ 45 ລ້ານກີບ ຈ່າຍໃຫ້ບາດດຽວ. ລວມທັງໝົດບວກເຂົ້າກັນຄົບ 100 ລ້ານກີບ ຖືວ່າສຳເລັດ ແລະ ສົ່ງຕົວກັບບ້ານເກີດເມືອງນອນ.
ຜູ້ກ່ຽວໃຫ້ຂໍ້ມູນຕື່ມວ່າ: ຜູ້ຍິງທີ່ຈະນຳໄປຖືພານີ້ແມ່ນນຳໄປຖືພາໃຫ້ຄົນຈີນທີ່ເຂົາບໍ່ສາມາດມີລູກດ້ວຍຕົນເອງໄດ້ຢູ່ບໍ່ເຕັນ ແລະ ຖືພາໃຫ້ກຸ່ມຊາຍຮັກຊາຍແຕ່ຢາກມີລູກ ປັດຈຸບັນນີ້ຕ້ອງການຜູ້ຍິງໄປຖືພາໃຫ້ 12 ຄົນ.
ຕາມການສັງເກດການໃຫ້ຂໍ້ມູນ ແລະ ຈຳນວນເດັກນ້ອຍທີ່ເຂົາເຈົ້າຕ້ອງການນັ້ນຖືວ່າມີຈຳນວນຫລາຍ ອາດຈະບໍ່ແມ່ນຄວາມຕ້ອງການຢາກມີລູກແບບທຳມະດາແລ້ວ ອາດຈະເປັນການຄ້າມະນຸດແອບແຝງກໍເປັນໄດ້ ສະຈຶ່ງຝາກເຕືອນໃຫ້ຜູ້ຍິງລາວໃນສັງຄົມຈົ່ງມີສະຕິຄິດໄຕ່ຕອງໃຫ້ດີວ່າການທີ່ໄປຮັບຈ້າງແບບນີ້ໄດ້ຄຸ່ມເສຍຫລືບໍ່ ເພາະເຂົາຈະນຳຕົວໄປກັກບໍລິເວນໃຫ້ຢູ່ໃນຂອບເຂດທີ່ເຂົາກຳນົດໄວ້ ແລະ ບໍ່ຮູ້ໄດ້ວ່າຫລັງເກີດລູກໃຫ້ເຂົາແລ້ວຈະໄດ້ກັບບ້ານເກີດຫລືບໍ່? ສະນັ້ນໃຫ້ລະວັງຢ່າຫລົງເຊື່ອຈົນຕົກເປັນເຫຍື່ອຂອງກຸ່ມຄ້າມະນຸດຂ້າມຊາດທີ່ແອບແຝງ ແລະ ຝາກເຖິງພາກສ່ວນກ່ຽວຂ້ອງກວດສອບຂະບວນການດັ່ງກ່າວດ້ວຍ.
