ສປປ ລາວ ໄດ້ຮັບສິດຟຣີວີຊ່າພັກອາໄສຢູ່ໄທໄດ້ຍາວບໍ່ເກີນ 60 ມື້ (ປົກກະຕິບໍ່ເກີນ 30 ມື້) ເລີ່ມເດືອນມິຖຸນາ 2024

ວັນທີ 28 ພຶດສະພາ 2024, ທ່ານ ໄຊ ວັດຊະລົງ ໂຄສົກປະຈຳສຳນັກງານລັດຖະມົນຕີແຫ່ງປະເທດໄທ ໄດ້ເປີດເຜີຍວ່າ: ກອງປະຊຸມຄະນະລັດຖະມົນຕີມີມະຕິເຫັນດີໃນຫຼັກການດຳເນີນມາດຕະການ ແລະ ແນວທາງການອຳນວຍຄວາມສະດວກ ເພື່ອກະຕຸ້ນເສດຖະກິດ ແລະ ການທ່ອງທ່ຽວຂອງປະເທດໄທ 3 ໄລຍະກໍຄື: ໄລຍະສັ້ນ, ໄລຍະກາງ, ໄລຍະຍາວ.

ສຳລັບ ມາດຕະການໄລຍະສັ້ນ ແມ່ນຈະເລີ່ມປະຕິບັດ ໃນເດືອນມິຖຸນາ 2024 ເຊິ່ງປະກອບດ້ວຍ 5 ຂໍ້ ດັງນີ້:

1. ວີຊ່າຟຣີ ສາມາດເຂົ້າພັກເຊົາ ໃນປະເທດໄທບໍ່ເກີນ 60 ວັນ (ຜ.60) ເຊິ່ງແມ່ນປະເທດທີ່ໄດ້ຮັບສິດ (ຜ.30) ເກົ່າ ທັງໝົດ 57 ປະເທດ/ດິນແດນ ແລະ ເພີ່ມປະເທດທີ່ໄດ້ຮັບສິດ (ຜ.30) ໃໝ່ຈຳນວນ 36 ປະເທດ/ດິນແດນລວມເປັນທັງໝົດ 93 ປະເທດ. 36 ປະເທດ/ດິນແດນທີ່ເພີ່ມໃໝ່ ປະກອບມີ ພູຖານ, ບູນກາຣີ, ໄຊປຣັດ, ຟິຈິ, ຈໍເຈຍ, ອິນເດຍ, ກາຊັກສະຖານ, ມອລຕາ, ແມັກຊິກົວ, ປາປົວນິວກິນີ, ໂຣມາເນຍ, ອຸເບກິສຖານ, ໄຕ້ຫວັນ, ຈີນ, ລາວ, ມາເກົ້າ, ມົງໂກລີ, ຣັດເຊຍ, ​ກຳປູເຈຍ, ເອລເບເນຍ, ໂຄລຳເບຍ,​ໂຄເອເຊຍ, ກຸຍບາ, ກຸ່ມລັດໂດມິນິກາ, ໂດມິນິກັນ, ເອກົວດໍ, ກົວເຕມາລາ, ຈາເມກາ, ຮັດໄມຈໍແດນ, ໂກໂຊໂວ, ໂມຣັອກໂກ, ປານາມາ, ສີລັງກາ, ຕຣິນິແດດແອນໂຕເບໂກ, ຕອງກາ ແລະ ອູຣູໄກວ.

2. ສຳລັບການໃຫ້ສິດ Visa on Arrival (VOA) ກໍຄື ການຂໍວີຊ່າຢູ່ທີ່ດ່ານກວດຄົນເຂົ້າເມືອງແມ່ນຍັງມີປົກກະຕິ ເຊິ່ງຈະໄດ້ປະຕິບັດຕາມກົດລະບຽບທີ່ໄດ້ກຳນົດ.

3.⁠ ເພີ່ມການກວດວີຊ່າປະເພດໃໝ່ Destination Thailand Visa (DTV) ສຳລັບຄົນຕ່າງດ້າວທີ່ມີທັກສະ ແລະ ການເຮັດວຽກທາງໄກ ເຊິ່ງສາມາດພັກອາໄສໃນປະເທດໄທເພື່ອເຮັດວຽກ ແລະ ທ່ອງທ່ຽວໄປພ້ອມກັນ ໂດຍມີນາຍຈ້າງ ແລະ ລູກຄ້າຢູ່ຕ່າງປະເທດ.

4. ການປັບປຸງສິດສຳລັບນັກສຶກສາຕ່າງຊາດທີ່ເຂົ້າຮຽນລະດັບປະລິນຍາຕີຂຶ້ນໄປທີ່ໄດ້ຮັບການກວດວີຊ່າ Non-Immigrant Visa ລະຫັດ ED ເຊິ່ງເປັນການອຳນວຍຄວາມສະດວກແກ່ນັກສຶກສາຕ່າງຊາດທີ່ກຳລັງສຶກສາ ຫຼື ກຳລັງຈະຈົບການສຶກສາໃນປະເທດໄທ ເພື່ອດຶງດູດຜູ້ທີ່ມີທັກສະເຂົ້າສູ່ຕະຫຼາດແຮງງານປະເທດໄທ.

5.⁠ ⁠ມີການແຕ່ງຕັ້ງຄະນະກຳມະການໂດຍກຳນົດນະໂຍບາຍການກວດວີຊ່າເພື່ອເປັນກົນໄກສຳຄັນໃນການກຳນົດນະໂຍບາຍການກວດວີຊ່າຂອງປະເທດໄທ.