ນະຄອນຫລວງນິວເດລີມີອຸນຫະພູມສູງສຸດເປັນປະຫວັດສາດ 49.9 ອົງສາ
ອຸນຫະພູມຢູ່ເມືອງຫລວງຂອງອິນເດຍເພີ່ມສູງເປັນປະຫວັດສາດເກືອບ 50 ອົງສາ.
ວັນທີ 29 ພຶດສະພາ, ສໍານັກຂ່າວຕ່າງປະເທດລາຍງານວ່າ: ກົມອຸຕຸນິຍົມວິທະຍາແຫ່ງຊາດອິນເດຍ (IMD) ລາຍງານການວັດແທກອຸນຫະພູມຢູ່ນະຄອນຫລວງນິວເດລີໄດ້ສູງເປັນປະຫວັດສາດ 49.9 ອົງສາ ໃນວັນທີ 28 ພຶດສະພາຜ່ານມາ ເຊິ່ງສູງກວ່າ IMD ຄາດຄະເນໄວ້ກ່ອນໜ້ານີ້ເຖິງ 9 ອົງສາ. IMD ຈຶ່ງອອກປະກາດເຕືອນໄພລະດັບສີແດງໃນເມືອງຫລວງ ເພື່ອກະຕຸ້ນໃຫ້ປະຊາຊົນເພີ່ມການຮັກສາສຸຂະພາບ ທ່າມກາງສະພາບອາກາດທີ່ຮ້ອນ.
ສະຖິຕິອຸນຫະພູມສູງສຸດຂອງນະຄອນຫລວງນິວເດລີກ່ອນໜ້ານີ້ ວັດແທກໄດ້ 49.2 ອົງສາ ໃນເດືອນພຶດສະພາ 2022. ຂະນະດຽວກັນ ສະພາບອາກາດທີ່ຮ້ອນເຮັດໃຫ້ເທດສະບານນະຄອນຫລວງນິວເດລີອອກປະກາດ ຂໍການຮ່ວມມືໃຫ້ປະຊາຊົນໃຊ້ນໍ້າຢ່າງປະຢັດ ເນື່ອງຈາກອຸນຫະພູມເຊິ່ງຈະຍັງສູງໃນໄລຍະນີ້ ໂດຍລະດັບນໍ້າໃນແມ່ນໍ້າຍະມຸນາ ເຊິ່ງເປັນໜຶ່ງໃນສາຂາຂອງແມ່ນໍ້າຄົງຄາ ແລະ ໄຫລຜ່ານນະຄອນຫລວງນິວເດລີຫລຸດລົງຫລາຍ ໃນຫລາຍເດືອນຜ່ານມາ.
ຂະນະດຽວກັນ, ປະຊາຊົນຈໍານວນບໍ່ໜ້ອຍໃນນະຄອນຫລວງນິວເດລີ ກ່າວໂທດເຫດຜົນຂອງສະພາບອາກາດຮ້ອນ ເປັນຜົນຈາກກະແສລົມຮ້ອນ ເຊິ່ງເຄື່ອນທີ່ລອຍມາຈາກລັດຣາຊສະຖານທີ່ຢູ່ທາງເໜືອ ແລະ ມີສະຖິຕິອຸນຫະພູມສູງສຸດໃນປະເທດ ໃນວັນທີ 28 ພຶດສະພາຜ່ານມາ ໂດຍວັດແທກໄດ້ 50.5 ອົງສາ.
