ໃບພັດເຮືອບິນດູດຄົນ ເສຍຊີວິດກາງສະໜາມບິນອໍາສະເຕີດໍາ

     ມີຜູ້ເສຍຊີວິດຫລັງຕົກລົງໄປໃນໃບພັດຂອງເຮືອບິນ ສາຍການບິນເຄແອລເອັມ ຣໍຢັລດັດ ເຊິ່ງຈອດຢູ່ສະໜາມບິນນາໆຊາດສະຄິບໂຮລ ໃນໂຮນລັງ.

     ວັນທີ 30 ພຶດສະພາ, ສໍານັກຂ່າວຕ່າງປະເທດລາຍງານວ່າ: ມີຜູ້ເສຍຊີວິດພາຍຫລັງຖືກດູດເຂົ້າໄປໃນໃບພັດເຮືອບິນທີ່ກໍາລັງເຮັດວຽກຢູ່ ຂອງເຮືອບິນໂດຍສານ ສານການບິນເຄແອລເອັມ ບໍລິເວນບ່ອນຈອດ ນອກອາຄານຜູ້ໂດຍສານສະໜາມບິນນາໆຊາດ ອໍາສະເຕີດໍາ ສະຄິບໂຮລ.

      “ອຸປະຕິເຫດເກີດຂຶ້ນຢູ່ສະໜາມບິນສະຄິບໂຮລຄັ້ງນີ້ ມີຜູ້ເສຍຊີວິດໃນເຄື່ອງຈັກຂອງເຮືອບິນທີ່ເຮັດວຽກຢູ່” ເຄແອລເອັມ ລະບຸໃນຖະແຫລງການ.

     ຕໍາຫລວດຊາຍແດນໂຮນລັງ ເຊິ່ງຮັບຜິດຊອບດ້ານການຮັກສາຄວາມປອດໄພໃຫ້ສະໜາມບິນຂະໜາດໃຫຍ່ທີ່ສຸດຂອງປະເທດ ໃຫ້ຂໍ້ມູນວ່າ: ມີການອົບພະຍົບຜູ້ໂດຍສານອອກຈາກເຮືອບິນລໍາດັ່ງກ່າວແລ້ວ ແລະ ເຈົ້າໜ້າທີ່ກໍາລັງສືບສວນສອບສວນເຫດການທີ່ເກີດຂຶ້ນວ່າເປັນອຸປະຕິເຫດ ຫລື ມີມູນເຫດຈູງໃຈອື່ນ.

      ເຮືອບິນລໍາດັ່ງກ່າວເປັນເຮືອບິນເຈັດເອັມແບຣເອີ ສໍາລັບການເດີນທາງໄລຍະສັ້ນ ເຊິ່ງນໍາໃຊ້ໂດຍສາຍການບິນໃນເຄືອ ເຄແອລເອັມ ຊິຕີຮອບເປີ ໃຫ້ບໍລິການຖ້ຽວບິນໄປຈຸດໝາຍປາຍທາງໃກ້ຄຽງເຊັ່ນ: ນະຄອນຫລວງລອນດອນຂອງອັງກິດ. ສ່ວນເຮືອບິນລໍາເກີດເຫດມີກໍານົດເດີນທາງສູ່ເມືອງບິລລັນ ທາງຕອນໃຕ້ຂອງດານມາກ.

      ທັງນີ້, ມາດຕະການດ້ານຄວາມປອດໄພຂອງສະໜາມບິນສະຄິບໂຮລ ມີຄວາມເຂັ້ມງວດສູງ ແລະ ອຸປະຕິເຫດບໍ່ຄ່ອຍເກີດຂຶ້ນຢູ່ສະໜາມບິນແຫ່ງນີ້. ຕາມລາຍງານຂອງສະໜາມບິນ ສະຄິບໂຮລຮອງຮັບຜູ້ໂດຍສານປະມານ 5,5 ລ້ານຄົນ ໃນເດືອນເມສາຜ່ານມາ ພຽງເດືອນດຽວ.