ຫາລື ຄວາມຄືບໜ້າການກະກຽມເປັນເຈົ້າພາບ ແລະ ປະທານກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57

ວັນທີ 28 ພຶດສະພາ 2024 ນີ້, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ຮອງປະທານ, ຜູ້ປະຈໍາການຄະນະກໍາມະການຊີ້ນໍາ ລະດັບຊາດ ເພື່ອກະກຽມ ແລະ ດໍາເນີນການເປັນປະທານອາຊຽນ ຂອງ ສປປ ລາວ ໃນປີ 2024 ໄດ້ເປັນປະທານ ກອງປະຊຸມລາຍງານຄວາມຄືບໜ້າໃນການກະກຽມເປັນເຈົ້າພາບ ແລະ ປະທານກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມອື່ນໆທີ່ກ່ຽວຂ້ອງ ເຊິ່ງຈະຈັດຂຶ້ນໃນລະຫວ່າງວັນທີ 21-27 ກໍລະກົດ 2024 ທີ່ນະຄອນຫລວງວຽງຈັນ.

ເພື່ອປຶກສາຫາລື ແລະ ກວດກາຄືນຄວາມຄືບໜ້າບັນດາໜ້າວຽກຮີບດ່ວນຂອງແຕ່ລະອະນຸກຳມະການ ເຊັ່ນ: ການກະກຽມດ້ານເນື້ອໃນ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການຈັດສັນສະຖານທີ່ພັກສຳລັບລັດຖະມົນຕີ ແລະ ຄະນະຜູ້ແທນຫລາຍກວ່າ 30 ປະເທດ ທີ່ຈະມາຮ່ວມປະຊຸມ, ຄວາມພ້ອມຂອງສະຖານທີ່ປະຊຸມ, ການກະກຽມດ້ານພາຫະນະຮັບໃຊ້ລັດຖະມົນຕີ, ເຈົ້າໜ້າທີ່ອາວຸໂສ ແລະ ບັນດາຄະນະຜູ້ແທນ, ຄວາມເປັນລະບຽບພາຍໃນຕົວເມືອງນະຄອນ ຫລວງວຽງຈັນ ເປັນຕົ້ນ ການປັບປຸງຖະໜົນຫົນທາງ ແລະ ຄວາມເປັນລະບຽບດ້ານຈະລາຈອນ, ຄວາມພ້ອມດ້ານສະໜາມບິນ, ຄວາມພ້ອມດ້ານລະບົບການສື່ສານ ແລະ ອິນເຕີເນັດ, ບຸກຄະລາກອນຮັບໃຊ້ກອງປະຊຸມ, ຄວາມພ້ອມດ້ານສະຖານທີ່ທ່ອງທ່ຽວ ແລະ ວຽກອື່ນໆທີ່ກ່ຽວຂ້ອງ.

ພ້ອມນີ້, ທ່ານ ຮອງນາຍົກລັດຖະມົນຕີ ໄດ້ເນັ້ນໃຫ້ບັນດາອະນຸກໍາມະການ ສືບຕໍ່ດໍາເນີນການໜ້າວຽກຂອງຕົນດ້ວຍຄວາມເອົາໃຈໃສ່ ແລະ ມີຄວາມຮັບຜິດຊອບສູງ ເພື່ອຮັບປະກັນໃຫ້ການເປັນເຈົ້າພາບ ແລະ ປະທານກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມອື່ນໆທີ່ກ່ຽວຂ້ອງ ເຊິ່ງຈະຈັດຂຶ້ນໃນວັນທີ 21-27 ກໍລະກົດ 2024 ໃຫ້ໄດ້ຮັບຜົນສໍາເລັດຢ່າງຈົບງາມ.