ເຕືອນເຝົ້າລະວັງ! ວັນທີ 29 ພຶດສະພາ ຫາ 2 ມິຖຸນາ ຝົນຈະຕົກໜັກເຮັດໃຫ້ເກີດມີນໍ້າຖ້ວມຊຸ, ດິນເຈື່ອນ ແລະ ຕົ້ນໄມ້ໃຫຍ່ຫັກລົ້ມ
May 28, 2024 - 4:26 PM
ກົມອຸຕຸນິຍົມ ແລະ ອຸທົກກະສາດ ແຈ້ງເຕືອນເຝົ້າລະວັງ ເນື່ອງຈາກວ່າໃນໄລຍະວັນທີ 29 ພຶດສະພາ ຫາ 2 ມິຖຸນາ 2024 ຄວາມກົດດັນຕໍ່າຂອງອາກາດ ຈະປົກຄຸມຢູ່ທົ່ວທຸກພາກຂອງປະເທດລາວດ້ວຍກໍາລັງອ່ອນ ຫາ ປານກາງ ສົມທົບກັບກະແສລົມຕາເວັນຕົກສ່ຽງໃຕ້ຈະມີກໍາລັງແຮງຂຶ້ນພັດປົກຄຸມ, ຊຶ່ງຈະເຮັດໃຫ້ມີ ຝົນຕົກ ຟ້າຮ້ອງ ຟ້າເຫລື້ອມໃນລະດັບຄ່ອຍ ຫາ ປານກາງຢູ່ທົ່ວໄປ ແລະ ຕົກໜັກຢູ່ບາງທ້ອງຖິ່ນ ໃນແຕ່ລະພາກ.
ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນ, ອໍານາດການປົກຄອງ ແລະ ອົງການຈັດຕັ້ງທຸກພາກສ່ວນ ຈົ່ງມີສະຕິ ລະມັດລະວັງຕໍ່ສະພາບຝົນຕົກ ຟ້າຮ້ອງ ຟ້າເຫລື້ອມ ໃນລະດັບປານກາງ ຫາ ແຮງ ແລະ ມີລົມພັດແຮງຢູ່ບາງທ້ອງຖິ່ນ ທີ່ຈະ ເຮັດໃຫ້ເກີດມີນໍ້າຖ້ວມຊຸ, ດິນເຈື່ອນ ແລະ ຕົ້ນໄມ້ໃຫຍ່ຫັກລົ້ມ. ຂໍໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.
