ທ່ານ ອາເບະ ຈະເອົາຈິງເລື່ອງ ສປປ ເກົາຫລີ ຫລັງໄດ້ສຽງສ່ວນຫລາຍໃນສະພາ
ນາຍົກລັດຖະມົນຕີ ຊິນໂຊ ອາເບະ ຂອງຍີ່ປຸ່ນ ລະບຸວ່າ: ຈະມຸ່ງແກ້ໄຂບັນຫາ ສປປ ເກົາຫລີ ຢ່າງແນ່ນອນ, ຫລັງໄດ້ຮັບໄຊຊະນະຢ່າງລົ້ນເຫລືອໃນການເລືອກຕັ້ງທົ່ວໄປໃນວັນທີ 22 ຕຸລາ.
ພັນທະມິດພັກຮ່ວມລັດຖະບານພາຍໃຕ້ການນຳຂອງທ່ານ ອາເບະ ເຊິ່ງປະກອບມີພັກເສລີປະຊາທິປະໄຕ (LDP) ແລະ ພັກໂຄເມໂຕ ໄດ້ບ່ອນນັ່ງໃນສະພາຜູ້ແທນລາຊະດອນທັງໝົດ 312 ບ່ອນນັ່ງ ເຮັດໃຫ້ມີສຽງສ່ວນຫລາຍຢ່າງເດັດຂາດ ເຖິງ 2 ໃນ 3 ເຊິ່ງຄະແນນສຽງລະດັບດັ່ງກ່າວພຽງພໍຕໍ່ແຜນແກ້ໄຂລັດຖະທຳມະນູນທີ່ຜູ້ນຳຍີ່ປຸ່ນໄດ້ວາງໄວ້ກ່ອນໜ້ານີ້.
ທ່ານ ອາເບະ ກ່າວຫລັງໄດ້ຮູ້ຜົນສຳຫລວດຄະແນນສຽງຢູ່ໜ່ວຍເລືອກຕັ້ງວ່າ: ຂ້າພະເຈົ້າເຄີຍໃຫ້ຄຳໝັ້ນໄວ້ໃນການຫາສຽງເລືອກຕັ້ງ “ພາລະກິດສຳຄັນທີ່ສຸດຄືມຸ່ງແກ້ໄຂບັນຫາ ສປປ ເກົາຫລີ ຢ່າງຈິງຈັງ”.
ໃນໄລຍະຫລາຍເດືອນກ່ອນ, ສປປ ເກົາຫລີ ທົດລອງຍິງລູກສອນໄຟຂ້າມເກາະຮອກໄກໂດຂອງຍີ່ປຸ່ນສອງຄັ້ງ ເຊິ່ງເປັນສ່ວນໜຶ່ງຂອງສາເຫດເຮັດໃຫ້ທ່ານ ອາເບະ ປະກາດຍຸບສະພາ ແລະ ຈັດການເລືອກຕັ້ງໃໝ່ຢ່າງກະທັນຫັນ ເພື່ອຂໍການອະນຸມັດຈາກຊາວຍີ່ປຸ່ນໃນການແກ້ໄຂວິກິດຫລາຍດ້ານ ເຊິ່ງລວມທັງບັນຫາຄວາມໝັ້ນຄົງ ແລະ ການແກ້ໄຂມາດຕາ 9 ໃນລັດຖະທຳມະນູນຂອງຍີ່ປຸ່ນ ເພື່ອຟື້ນຟູສະຖານະຂອງກອງທັບ ແລະ ສິດໃນການເຮັດສົງຄາມຂອງປະເທດ.
ສຽງສ່ວນຫລາຍເຖິງ 2 ໃນ 3 ຂອງສະພາຜູ້ແທນລາຊະດອນ ທີ່ທ່ານ ອາເບະ ໄດ້ຮັບຈາກການເລືອກຕັ້ງຄັ້ງນີ້ ຈະເຮັດໃຫ້ການແກ້ໄຂລັດຖະທຳມະນູນມາດຕາດັ່ງກ່າວເປັນໄປໄດ້ງ່າຍຂຶ້ນ. ແຕ່ຢ່າງໃດກໍຕາມ, ທ່ານລະບຸວ່າ: ຈະພະຍາຍາມຮວບຮວມສຽງສະໜັບສະໜູນຈາກປະຊາຊົນໃຫ້ໄດ້ຫລາຍທີ່ສຸດ ກ່ອນຈະດຳເນີນການໃນເລື່ອງນີ້.
ທ່ານ ອາເບະ ອາຍຸ 63 ປີ ກຳລັງຈະໄດ້ເປັນນາຍົກລັດຖະມົນຕີຍີ່ປຸ່ນ ທີ່ຢູ່ໃນຕຳແໜ່ງຍາວນານທີ່ສຸດໃນປະຫວັດສາດຍຸກໃໝ່, ຖ້າລັດຖະບານທີ່ກຳລັງຈະຈັດຕັ້ງຂຶ້ນນີ້ມີສະຖຽນລະພາບ ແລະ ສາມາດບໍລິຫານງານຕໍ່ໄປຈົນເຖິງມະຫະກຳກິລາໂອລິມປິກຢູ່ນະຄອນຫລວງໂຕກຽວ ເຊິ່ງຈະຈັດຂຶ້ນໃນປີ 2020.
ສຳນັກຂ່າວກຽວໂຕລາຍງານວ່າ: ມີຜູ້ມາໃຊ້ສິດອອກສຽງເລືອກຕັ້ງໃນວັນທີ 22 ຕຸລາປະມານ 53,7% ເຊິ່ງເປັນຈຳນວນສູງກວ່າການເລືອກຕັ້ງທົ່ວໄປຄັ້ງຜ່ານມາເມື່ອ 3 ປີກ່ອນພຽງເລັກໜ້ອຍ ເນື່ອງຈາກພາຍຸໄຕ້ຝຸ່ນລານ (Lan) ພັດຖະຫລົ່ມຍີ່ປຸ່ນ ເຮັດໃຫ້ມີຜູ້ເສຍຊີວິດ 2 ຄົນ ແລະ ການປະກາດຜົນເລືອກຕັ້ງຢ່າງເປັນທາງການຕ້ອງຊັກຊ້າອອກໄປ.
