ຄົນລາວສະໝອງໄຫລຍ້ອນໄພເງິນເຟີ້

ໂດຍ: ທິດກໍ່າ

ສະພາບເງິນກີບລາວອ່ອນຄ່າພາໃຫ້ຄົນລາວຈໍານວນບໍ່ໜ້ອຍໜີອອກຈາກປະເທດເພື່ອໄປທໍາງານຫາເງິນຢູ່ຕ່າງແດນ. ໃນບັນດາປະເທດທີ່ແຮງງານລາວໄປຫລາຍກວ່າໝູ່ກໍແມ່ນປະເທດໄທ. ນອກຈາກນັ້ນ ກໍມີ ສ.ເກົາຫລີ ແລະ ປະເທດອື່ນໆອີກຫລາຍບ່ອນໃນພາກພື້ນອາຊີແຖວຕາເວັນອອກກາງ ແລະ ຍີ່ປຸ່ນເຫລົ່ານີ້ເປັນຕົ້ນ.

ເມື່ອກ່າວເຖິງແຮງງານລາວທີ່ໜີໄປທໍາງານຢູ່ຕ່າງແດນມັນກໍມີອັນດີ ແລະ ອັນຕັ້ງໜ້າ, ແຕ່ວ່າມັນກໍມີຜົນກະທົບບໍ່ໜ້ອຍຕໍ່ແຮງງານພາຍໃນປະເທດເປັນຕົ້ນ ອັນດີ ແລະ ຕັ້ງໜ້ານັ້ນມັນກໍແມ່ນນໍາເອົາເງິນຕາເຂົ້າປະເທດ, ເປັນການຊ່ວຍໜູນເກື້ອກູນຄອບຄົວໃຫ້ມີຢູ່ມີກິນ, ມີໃຊ້ມີຈ່າຍ, ຍິ່ງໄປກວ່ານັ້ນ ບາງຄົນກໍມີເງິນມີຄໍາມາພັດທະນາຄອບຄົວ ທັງໄດ້ບົດຮຽນ ແລະ ວິຊາອາຊີບຕິດໂຕ ເພື່ອມາຕໍ່ຍອດຈາກປະສົບປະການທີ່ຕົນເອງເຄີຍຜ່ານ. ສ່ວນຜົນກະທົບນັ້ນ ອັນບໍ່ດີປານໃດນັ້ນ, ມັນກໍມີຢູ່ວ່າເກີດບັນຫາການຂາດແຮງງານພາຍໃນປະເທດ.

ຕົວຢ່າງ: ໃນສະພາບປັດຈຸບັນ ບັນດາໂຮງຈັກໂຮງງານທີ່ມີຢູ່ໃນລາວພາກັນຂາດແຮງງານຢ່າງຫລວງຫລາຍຈໍາຕ້ອງໄດ້ປະກາດຮັບສະໝັກເອົາຄົນເປັນຮ້ອຍເປັນພັນ ທັງໃຫ້ອຸດໜູນເກື້ອກູນຕ່າງໆ, ແຕ່ຜູ້ໄປສະໝັກນັ້ນກໍຍັງມີໜ້ອຍ ບໍ່ພຽງພໍກັບຄວາມຮຽກຮ້ອງຕ້ອງການ ເພາະສະຫວັດດີການທີ່ໃຫ້ໄປນັ້ນມັນກໍຍັງຕໍ່າ ຖ້າທຽບໃສ່ການໄປທໍາງານຢູ່ຕ່າງປະເທດ. ຕົວຢ່າງເຮັດວຽກຢູ່ພາຍໃນສະເລ່ຍເດືອນໜຶ່ງກໍພຽງ 2 ຫາ 3 ຫລື 4 ຫາ 5 ລ້ານຢ່າງຫລາຍ. ສ່ວນຜູ້ທີ່ໄປທໍາງານຢູ່ຕ່າງປະເທດສະເລ່ຍເດືອນໜຶ່ງໄດ້ 7 ຫາ 8 ລ້ານ ຫລື 10 ລ້ານ. ສະເພາະຢູ່ປະເທດ ສ.ເກົາຫລີ ສະເລ່ຍເດືອນໜຶ່ງກໍຈະຕົກຢູ່ 30 ຫາ 40 ລ້ານ. ບັນດາໜ້າວຽກທີ່ໄປເຮັດສ່ວນຫລາຍກໍຄືເປັນກໍາມະກອນໃນໂຄງການກໍ່ສ້າງ, ວຽກກະສິກໍາ, ບໍລິການໃນຮ້ານອາຫານ ແລະ ໂຮງແຮມຕາມຄວາມຕ້ອງການຂອງຜູ້ວ່າຈ້າງ.

ສໍາລັບເປົ້າໝາຍ ແລະ ເງື່ອນໄຂຂອງຜູ້ທີ່ໄປນັ້ນ ສ່ວນຫລາຍກໍແມ່ນຊາວໜຸ່ມຍິງຊາຍທີ່ມີອາຍຸແຕ່ 25 ຫາ 35 ປີ ກ່ອນເດີນທາງໄປຕ້ອງໄດ້ຜ່ານການສໍາພາດຄົບຕາມເງື່ອນໄຂ ແລ້ວຕ້ອງໄດ້ຮຽນພາສາພື້ນຖານຂອງປະເທດນັ້ນໆ ເພື່ອສະດວກໃນການສື່ສານເບື້ອງຕົ້ນ.

ຢ່າງໃດກໍດີ, ໃນເງື່ອນໄຂທີ່ປະເທດຊາດຂອງພວກເຮົາຕົກຢູ່ໃນສະພາບວິກິດທາງເສດຖະກິດ-ການເງິນ ໂດຍສະເພາະບັນຫາທີ່ພວກເຮົາພວມຜະເຊີນກໍຄືປັດໄຈເງິນກີບລາວອ່ອນຄ່າ, ສິນຄ້າກໍແພງ, ຄ່າແຮງຊໍ້າພັດຍັງຕໍ່າ ຜູ້ທີ່ຍັງມີເຫື່ອແຮງ ມີແນວຄິດປັນຍາ ມັນສະໝອງເຕັມປ່ຽມມີເງື່ອນໄຂຄົບຖ້ວນກໍຈໍາເປັນຕ້ອງຊອກຫາທາງອອກເພື່ອເອົາຊີວິດຢູ່ລອດ. ໃຜຈະປະກອບທຸລະກິດການງານອັນໃດຢູ່ໃສກໍລ້ວນແລ້ວແຕ່ເພື່ອຕົນເອງ, ມີພັນທະເພື່ອປະເທດຊາດບ້ານເມືອງ ຈຶ່ງເປັນສາເຫດໜຶ່ງທີ່ເຮັດໃຫ້ຄົນລາວຈໍານວນບໍ່ໜ້ອຍພາກັນສະໝອງໄຫລຍ້ອນປັດໄຈເງິນເຟີ້ເປັນເຫດ.