ເຮືອບິນ Qatar Airways ຕົກຫລຸມອາກາດ ມີຜູ້ບາດເຈັບ 12 ຄົນ
ເກີດເຫດເຮືອບິນ Boeing 787-9 ຖ້ຽວບິນ QR017 ຂອງສາຍການບິນ Qatar Airways ຕົກຫລຸມອາກາດຈົນມີຜູ້ບາດເຈັບ ໃນລະຫວ່າງເດີນທາງຈາກໂດຮາ ປະເທດກາຕາ ມຸ່ງໜ້າສູ່ນະຄອນ ຫລວງດັບລິນຂອງອຽກລັງ ໃນວັນທີ 26 ພຶດສະພາ ໂດຍເຮືອບິນສາມາດລົງຈອດໄດ້ຢ່າງປອດໄພຢູ່ນະຄອນຫລວງດັບລິນ.
ຖະແຫລງການຈາກສະໜາມບິນດັບລິນ ລະບຸວ່າ: ມີຜູ້ບາດເຈັບຈາກເຫດການຕົກຫລຸມອາກາດຄັ້ງນີ້ 12 ຄົນ, ໃນນັ້ນມີຈຸບິນ 6 ຄົນ ແລະ ມີ 8ຄົນໄດ້ນຳສົ່ງໄປປິ່ນປົວຢູ່ໂຮງໝໍ.
ໂດຍສາຍການບິນ Qatar Airways ລະບຸໃນຖະແຫລງການວ່າ: ຈະມີການສອບສວນເຫດການດັ່ງກ່າວພາຍໃນ, ສ່ວນຜູ້ໂດຍສານ ແລະ ຈຸບິນຖ້ຽວບິນນີ້ບາດເຈັບເລັກໜ້ອຍ ແລະ ໄດ້ຮັບການເບິ່ງແຍງແລ້ວ. ພ້ອມຢືນຢັນວ່າ: ຄວາມປອດໄພຂອງຜູ້ໂດຍສານ ແລະ ຈຸບິນເປັນເລື່ອງສໍາຄັນລໍາດັບທໍາອິດ.
ການຕົກຫລຸມອາກາດຄັ້ງນີ້ເກີດຂຶ້ນໃນເວລາເຮືອບິນບິນຢູ່ເໜືອນ່ານຟ້າ ຕູເຣີເຄຍ (ຕວຽກກີ) ໂດຍຫລັງຈາກລົງຈອດ ແລະ ກວດສອບຄວາມປອດໄພແລ້ວ ເຮືອບິນລໍາດັ່ງກ່າວໄດ້ກັບມາໃຫ້ບໍລິການຖ້ຽວບິນຂາກັບ (QR018) ສູ່ ນະຄອນຫຼວງໂດຮາ ຕາມຕາຕະລາງບິນ, ແຕ່ຊັກຊ້າກວ່າກຳນົດ.
ເຫດການດັ່ງກ່າວເກີດຂຶ້ນພຽງບໍ່ເທົ່າໃດວັນຫລັງຈາກເຮືອບິນ Singapore Airlines ຖ້ຽວບິນ SQ321 ຕົກຫລຸມອາກາດຮຸນແຮງ ເວລາບິນຜ່ານນ່ານຟ້າມຽນມາ ກ່ອນຈະລົງຈອດສຸກເສີນຢູ່ສະໜາມບິນສຸວັນນະພູມ ນະຄອນຫລວງບາງກອກ ມີຜູ້ບາດເຈັບຫລາຍສິບຄົນ ແລະ ເສຍຊີວິດ 1 ຄົນ, ສະພາບອາກາດແປປວນທີ່ເກີດຂຶ້ນເລື້ອຍໆ ແລະ ຮຸນແຮງຂຶ້ນ ເຮັດໃຫ້ເຮືອບິນສ່ຽງຕົກຫລຸມອາກາດຫລາຍຂຶ້ນ.
ອ້າງອີງ:
