ອິດສະລາແອນຕອບໂຕ້ຄໍາສັ່ງສານໂລກໃຫ້ຢຸດບຸກຣາຟາ ອ້າງບໍ່ໄດ້ຫ້າມປົກປ້ອງຕົນເອງ
ທ່ານ ຊາຊີ ຮາເນກບີ ທີ່ປຶກສາດ້ານຄວາມໝັ້ນຄົງແຫ່ງຊາດຂອງທ່ານ ເບັນຈາມິນ ເນທັນຢາຮູ ນາຍົກລັດຖະມົນຕີອິດສະລາແອນ ໃຫ້ສໍາພາດຕໍ່ສະຖານີໂທລະພາບທ້ອງຖິ່ນໃນວັນທີ 25 ພຶດສະພາ ໂດຍສະແດງຄວາມເຫັນຕໍ່ຄໍາສັ່ງຂອງສານຍຸຕິທໍາສາກົນ (International Court of Justice: ICJ) ຫລື ສານໂລກ ທີ່ສັ່ງໃຫ້ອິດສະລາແອນຢຸດແຜນປະຕິບັດການຮຸກຮານທາງທະຫານຢູ່ເມືອງຣາຟາ ເຊິ່ງເປັນທີ່ຕັ້ງຄ້າຍຜູ້ອົບພະຍົບຊາວປາແລັສຕິນທາງຕອນໃຕ້ຂອງເຂດກາຊາ.
ທ່ານ ຮາເນກບີ ຢືນຢັນວ່າ: ປະຕິບັດການດັ່ງກ່າວບໍ່ແມ່ນການຂ້າລ້າງເຜົ່າພັນຊາວປາແລັສຕິນຢູ່ຣາຟາ ແລະ ຢືນຢັນວ່າ: ອິດສະລາແອນຈະບໍ່ກະທໍາການຂ້າລ້າງເຜົ່າພັນ.
ຂະນະທີ່ທ່ານຕອບຄໍາຖາມທີ່ວ່າ: ປະຕິບັດການໂຈມຕີຣາຟາຈະດໍາເນີນຕໍ່ໄປ ຫລື ບໍ່ ໂດຍຊີ້ວ່າ: ຕາມກົດໝາຍສາກົນ ພວກເຮົາມີສິດຈະປົກປ້ອງຕົນເອງ ແລະ ຫລັກຖານກໍຄືສານໂລກບໍ່ໄດ້ຂັດຂວາງບໍ່ໃຫ້ພວກເຮົາປົກປ້ອງຕົນເອງຕໍ່ໄປ.
ກ່ອນໜ້ານີ້, ທ່ານ ນາວາບ ຊາລາມ ປະທານ ICJ ກ່າວວ່າ: ອິດສະລາແອນຕ້ອງຢຸດການຮຸກຮານທາງທະຫານ ແລະ ການກະທໍາອື່ນໃດໃນເຂດປົກຄອງຣາຟາ ເຊິ່ງອາດເຮັດໃຫ້ເກີດຄວາມເສຍຫາຍຕໍ່ກຸ່ມຊາວປາແລັສຕິນຢູ່ເຂດກາຊາ ທີ່ອາດນໍາມາເຊິ່ງການທໍາລາຍລ້າງທາງກາຍະພາບທັງໝົດ ຫລື ບາງສ່ວນ.
ຂະນະທີ່ທາງການອິດສະລາແອນເບິ່ງວ່າ: ຂໍ້ຄວາມໃນຄໍາສັ່ງຂອງສານໂລກບໍ່ໄດ້ຕັດການດໍາເນີນງານທາງທະຫານທັງໝົດ ແລະ ຢືນຢັນວ່າ: ກອງທັບອິດສະລາແອນຈະບໍ່ດໍາເນີນການທາງທະຫານຢູ່ຣາຟາໃນລັກສະນະທີ່ອາດເຮັດໃຫ້ເກີດການທໍາລາຍລ້າງພົນລະເຮືອນຢູ່ເຂດກາຊາ.
ທັງນີ້, ຜົນຈາກສົງຄາມຢູ່ເຂດກາຊາທີ່ເກີດຂຶ້ນຫລັງກຸ່ມຮາມັດໂຈມຕີອິດສະລາແອນໃນວັນທີ 7 ຕຸລາ ຈົນຮອດປັດຈຸບັນ ພົບວ່າມີຊາວປາແລັສຕິນເສຍຊີວິດແລ້ວເກືອບ 36.000 ຄົນ.
ສ່ວນການເຈລະຈາຢຸດຍິງ ແລະ ປ່ອຍຕົວປະກັນນັ້ນຍັງບໍ່ມີທ່າທີຈະບັນລຸຜົນ ໂດຍຫລ້າສຸດລັດຖະບານອິດສະລາແອນຕັ້ງໃຈຈະເປີດການເຈລະຈາຮອບໃໝ່ກ່ຽວກັບຂໍ້ຕົກລົງປ່ອຍຕົວປະກັນໃນມໍ່ໆນີ້, ແຕ່ຜູ້ແທນກຸ່ມຮາມັດຢືນຢັນວ່າ: ຈະບໍ່ມີການເຈລະຈາຮອບໃໝ່ເກີດຂຶ້ນ ຫລັງຈາກອິດສະລາແອນປະຕິເສດຂໍ້ຕົກລົງທີ່ຮາມັດຍອມຮັບ ໂດຍມີອີຢິບ ແລະ ກາຕາເປັນຄົນກາງໄກ່ເກ່ຍກ່ອນໜ້ານີ້ ໂດຍເບິ່ງວ່າເງື່ອນໄຂຂໍ້ຕົກລົງບໍ່ເປັນໄປຕາມທີ່ຮຽກຮ້ອງ.
ອ້າງອີງ:
