ເກີດເຫດໄຟໄໝ້ຮ້ານເຄື່ອງຫລິ້ນເກມຢູ່ອິນເດຍ ມີຜູ້ເສຍຊີວິດ 24 ຄົນ
ທາງການອິນເດຍລາຍງານວ່າມີຜູ້ເສຍຊີວິດແລ້ວຢ່າງໜ້ອຍ 24 ຄົນ ໃນຈໍານວນນີ້ເປັນເດັກນ້ອຍຫລາຍຄົນ ພາຍຫລັງເກີດເຫດໄຟໄໝ້ຮ້ານເຄື່ອງຫລິ້ນເກມແຫ່ງໜຶ່ງໃນເມືອງຣາຊໂກ ລັດຄຸຊະຣາດ ທາງພາກຕາເວັນຕົກຂອງອິນເດຍ ໃນວັນທີ 25 ພຶດສະພາ.
ພາບທີ່ເຜີຍແຜ່ທາງໂຊຊຽວມີເດຍສະແດງໃຫ້ເຫັນໄຟໄໝ້ຂະໜາດໃຫຍ່ ແລະ ຄວັນໄຟຈໍານວນຫລາຍປົກຄຸມຢູ່ຮ້ານ TRP Game Zone ເຊິ່ງໄຟໄດ້ເຜົາທໍາລາຍໂຄງສ້າງອາຄານທັງໝົດ.
ຫລ້າສຸດທີມມອດໄຟໃກ້ຈະຄວບຄຸມໄຟໄດ້ແລ້ວ ໂດຍເບື້ອງຕົ້ນມີຄວາມເປັນໄປໄດ້ທີ່ຈໍານວນຜູ້ເສຍຊີວິດອາດເພີ່ມຂຶ້ນ. ຂະນະທີ່ໜ່ວຍກູ້ໄພຍັງເດີນໜ້າປະຕິບັດການຄົ້ນຫາ ແລະ ກູ້ຊີບ ແລະ ຢືນຢັນຈະດໍາເນີນຄະດີຢ່າງເຂັ້ມງວດຕໍ່ຜູ້ທີ່ຮັບຜິດຊອບເຫດການນີ້.
ສໍາລັບສາເຫດຂອງໄຟໄໝ້ຍັງບໍ່ມີການຢືນຢັນແນ່ນອນ, ແຕ່ທາງການທ້ອງຖິ່ນເຜີຍວ່າ: ທີມສືບສວນພິເສດກໍາລັງຢູ່ລະຫວ່າງການກວດສອບຂໍ້ມູນຄວາມຈິງ ໂດຍຫລ້າສຸດໄດ້ມີການຈັບກຸມ 2 ຜູ້ຖືກສົງໄສທີ່ກ່ຽວຂ້ອງຕໍ່ເຫດການທີ່ເກີດຂຶ້ນ.
ທ່ານ ນາເຣນທຣາ ໂມດີ ນາຍົກລັດຖະມົນຕີ ໂພສຂໍ້ຄວາມຜ່ານທາງ X ສະແດງຄວາມເສຍໃຈຕໍ່ຄອບຄົວຜູ້ເສຍຊີວິດ ແລະ ຢືນຢັນວ່າ: ໜ່ວຍງານທ້ອງຖິ່ນກໍາລັງເລັ່ງເຮັດວຽກເພື່ອໃຫ້ການຊ່ວຍເຫລືອຜູ້ໄດ້ຮັບຜົນກະທົບ.
ອ້າງອີງ:
