ສານໂລກສັ່ງອິດສະລາແອນ ຢຸດປະຕິບັດການທາງທະຫານຢູ່ເມືອງຣາຟາຂອງເຂດກາຊາ
ຄະນະຕຸລາການຍຸຕິທໍາສາກົນ ມີຄໍາພິພາກສາໃຫ້ອິດສະລາແອນຢຸດປະຕິບັດການທາງທະຫານຢູ່ເມືອງຣາຟາຂອງເຂດກາຊາ, ແຕ່ຍັງບໍ່ຊັດເຈນວ່າ: ອິດສະລາແອນຈະປະຕິບັດຕາມ ຫລື ບໍ່.
ວັນທີ 25 ພຶດສະພາ, ສໍານັກຂ່າວຕ່າງປະເທດລາຍງານວ່າ: ຄະນະຕຸລາການສານຍຸຕິທໍາສາກົນ (ICJ) ມີຄໍາພິພາກສາ ໃນວັນທີ 24 ພຶດສະພາ ຕາມຄໍາຮ້ອງຂອງລັດຖະບານອາຟຣິກາໃຕ້ວ່າ: ອິດສະລາແອນຕ້ອງຢຸດປະຕິບັດການທາງທະຫານທຸກຮູບແບບທີ່ເກີດຂຶ້ນແລ້ວຢູ່ເມືອງຣາຟາ ທາງຕອນໃຕ້ຂອງເຂດກາຊາ ແລະ ຍົກເລີກແຜນການທັງໝົດໃນອະນາຄົດ ເຊິ່ງອາດສົ່ງຜົນກະທົບຕໍ່ການດໍາລົງຊີວິດຂອງປະຊາຊົນຢູ່ເຂດກາຊາ.
ຂະນະດຽວກັນ, ICJ ມີມະຕິໃຫ້ອິດສະລາແອນຕ້ອງເປີດຈຸດຜ່ານແດນຣາຟາ ເຊິ່ງຕິດກັບອີຢິບ ເພື່ອໃຫ້ການສົ່ງມອບການຊ່ວຍເຫລືອດ້ານມະນຸດສະທໍາເປັນໄປດ້ວຍຄວາມລາບລື່ນ. ນອກຈາກນີ້ ສານຮຽກຮ້ອງໃຫ້ມີການປ່ອຍຕົວປະກັນທຸກຄົນອອກຈາກເຂດກາຊາທັນທີ ແລະ ໂດຍປາສະຈາກເງື່ອນໄຂ.
ສ່ວນກະຊວງການຕ່າງປະເທດອາຟຣິກາໃຕ້ອອກຖະແຫລງການວ່າ: ຄໍາພິພາກສາຂອງ ICJ ເປັນບາດກ້າວສໍາຄັນ ເນື່ອງຈາກເປັນມະຕິຄັ້ງທໍາອິດຢ່າງເປັນທາງການທີ່ເຈາະຈົງໃສ່ປະຕິບັດການທາງທະຫານຂອງອິດສະລາແອນຢູ່ເຂດກາຊາ.
ຕໍ່ມາທ່ານ ຊາຊີ ຮາເນກບີ ທີ່ປຶກສາດ້ານນະໂຍບາຍຄວາມໝັ້ນຄົງແຫ່ງຊາດຂອງອິດສະລາແອນ ກ່າວວ່າ: ອິດສະລາແອນບໍ່ເຄີຍ ແລະ ບໍ່ມີແຜນປະຕິບັດການທາງທະຫານຢູ່ເຂດກາຊາ ທີ່ຈະສົ່ງຜົນກະທົບຕໍ່ປະຊາຊົນໃນພື້ນທີ່ ບໍ່ວ່າຈະທັງໝົດ ຫລື ສ່ວນໜຶ່ງ ແລະ ຂໍຢືນຢັນວ່າ: ຈຸດຜ່ານແດນຣາຟາຈະຍັງເປີດດໍາເນີນງານຕໍ່ໄປຕາມປົກກະຕິ.
ເຖິງຢ່າງໃດກໍຕາມ, ພົນໂທ ເບນີ ກັນ ອະດີດລັດຖະມົນຕີປ້ອງກັນປະເທດອິດສະລາແອນ ເຊິ່ງເປັນໜຶ່ງໃນສະມາຊິກສໍາຄັນຂອງຄະນະລັດຖະມົນຕີສົງຄາມ ກ່າວວ່າ: ອິດສະລາແອນຈະຍັງເດີນໜ້າປະຕິບັດການທາງທະຫານທັງໝົດຕາມແຜນການ ລວມທັງຢູ່ເມືອງຣາຟາ ເພື່ອຊ່ວຍເຫລືອຕົວປະກັນທຸກຄົນ ແລະ ເພື່ອຄວາມປອດໄພຂອງພົນລະເຮືອນທຸກຄົນ ລວມທັງຢູ່ເມືອງຣາຟາ.
ຂະນະທີ່ກຸ່ມຮາມັດອອກຖະແຫລງການສະແດງຄວາມຍິນດີຕໍ່ຄໍາພິພາກສາຂອງ ICJ, ແຕ່ຜິດຫວັງທີ່ຄໍາພິພາກສາຄວບຄຸມສະເພາະເມືອງຣາຟາ ບໍ່ແມ່ນເຂດກາຊາທັງໝົດ, ສ່ວນທ່ານ ຣິຍາດ ມານຊູ ເອກອັກຄະລັດຖະທູດປາແລັສຕິນປະຈໍາສະຫະປະຊາຊາດ (UN) ຮຽກຮ້ອງອິດສະລາແອນປະຕິບັດຕາມມະຕິຂອງ ICJ ທັນທີ.
