ອົດສະຕຣາລີກວດພົບ ຜູ້ຕິດເຊື້ອໄຂ້ຫວັດສັດປີກ ຄົນທໍາອິດພາຍໃນປະເທດ

      ວັນທີ 22 ພຶດສະພາ, ສໍານັກງານສຸຂະພາບລັດວິກຕໍເຣຍ ໄດ້ອອກປະກາດແຈ້ງເຕືອນດ້ານສາທາລະນະສຸກ ພາຍຫລັງອົດສະຕຣາລີກວດພົບການຕິດເຊື້ອໄຂ້ຫວັດສັດປີກສາຍພັນ H5N1 ໃນມະນຸດຄົນທໍາອິດ ໂດຍພົບໃນເດັກຄົນໜຶ່ງທີ່ເດີນທາງກັບມາຈາກຕ່າງປະເທດໃນເດືອນມີນາຜ່ານມາ.

     ລາຍງານລະບຸວ່າ: ຜູ້ຕິດເຊື້ອຟື້ນຕົວເຕັມທີ່ແລ້ວ ຫລັງຈາກມີອາການຮຸນແຮງກ່ອນໜ້ານີ້ ແລະ ປັດຈຸບັນ ບໍ່ມີຫລັກຖານການແຜ່ເຊື້ອພາຍໃນລັດ, ສ່ວນໂອກາດການແຜ່ເຊື້ອໃນມະນຸດເພີ່ມນັ້ນມີໜ້ອຍ ເນື່ອງຈາກພະຍາດດັ່ງກ່າວແຜ່ລະຫວ່າງມະນຸດໄດ້ຍາກ.

     ໜ່ວຍງານກະສິກໍາຂອງລັດລາຍງານໃນວັນດຽວກັນວ່າ: ກວດພົບໄວຣັສໄຂ້ຫວັດສັດປີກໃນສັດປີກຢູ່ຟາມໄຂ່ໃກ້ກັບເມືອງເມເຣດິດ ເຊິ່ງເປັນເມືອງໃນຊົນນະບົດທີ່ຕັ້ງຢູ່ຫ່າງຈາກເມວເບິນໄປທາງຕາເວັນຕົກ 80 ກິໂລແມັດ, ແຕ່ການທົດສອບບົ່ງຊີ້ວ່າ: ບໍ່ກ່ຽວຂ້ອງກັບກໍລະນີຕິດເຊື້ອໃນມະນຸດ.

      ຖະແຫລງການຈາກໜ່ວຍງານກະສິກໍາຂອງລັດລະບຸອີກວ່າ: ກະສິກອນຜູ້ລ້ຽງສັດປີກ ແລະ ເຈົ້າຂອງນົກຄວນແຈ້ງຂໍ້ມູນຕໍ່ທາງການຖ້າພົບສັດປີກຕາຍໂດຍບໍ່ຮູ້ສາເຫດ.