ລີງຮາວເລີນັບຮ້ອຍໂຕຕົກຈາກຕົ້ນໄມ້ ຍ້ອນຂາດນໍ້າ ຈາກຄື້ນນຄວາມຮ້ອນເກືອບ 50 ອົງສາ ຢູ່ແມັກຊິກ
ລີງຮາວເລີ (Howler Monkeys) ຂອງແມັກຊິກ ຕົກລົງມາຈາກຕົ້ນໄມ້ ທ່າມກາງຄື້ນຄວາມຮ້ອນ ອຸນຫະພູມ 41-45 ອົງສາ, ບາງພື້ນທີ່ອາດສູງເກືອບ 50 ອົງສາ ເຮັດໃຫ້ລີງຮາວເລີທົນບໍ່ໄຫວ ຢູ່ໃນສະພາບຂາດນໍ້າ.
ວັນທີ 24 ພຶດສະພາ, ສໍານັກຂ່າວຕ່າງປະເທດລາຍງານວ່າ: ພົບລີງ 83 ໂຕຕາຍຢູ່ລັດທາບາສໂກຂອງແມັກຊິກ ສັດຕະວະແພດ ແລະ ອາສາສະໝັກພະຍາຍາມຊ່ວຍຊີວິດພວກມັນ ໂດຍການຍົກຖັງນໍ້າ ແລະ ອາຫານຂຶ້ນເທິງຕົ້ນໄມ້ ພ້ອມເບິ່ງແຍງທາງການແພດ.
ນັບແຕ່ວັນທີ 4 ພຶດສະພາມາຮອດປັດຈຸບັນ ໄດ້ຮັບລາຍງານການຕາຍຂອງລີງຮາວເລີແລ້ວ 83 ໂຕ ໃນລັດທາບາສໂກ, ໄລຍະທໍາອິດເຈົ້າໜ້າທີ່ນໍາເອົາຊາກລີງມາຫາສາເຫດການຕາຍ ພ້ອມຕັ້ງໜ່ວຍງານໃຫ້ຂໍ້ມູນປະຊາຊົນໃນທ້ອງຖິ່ນ.
ເຈົ້າໜ້າທີ່ລະບຸວ່າ: ເປັນການຕາຍຂອງສັດຫລາຍທີ່ສຸດໃນຮອບ 70 ປີ ນັບແຕ່ໄຂ້ເຫລືອງລະບາດ. ນອກຈາກຄື້ນຄວາມຮ້ອນສູງແລ້ວ, ໄພແຫ້ງແລ້ງຍາວນານ, ການຕັດໄມ້ທໍາລາຍປ່າ ແລະ ການຈູດປ່າ ກໍເປັນອີກໜຶ່ງສາເຫດ.
ທັງນີ້, ປະເທດແມັກຊິກຜະເຊີນຄື້ນຄວາມຮ້ອນຮຸນແຮງນັບແຕ່ກາງເດືອນມີນາຜ່ານມາ ອຸນຫະພູມເພີ່ມສູງເຖິງ 117 ອົງສາ ໃນບາງພື້ນທີ່ ແລະ ມີຜູ້ເສຍຊີວິດຢ່າງໜ້ອຍ 26 ຄົນຈາກສາເຫດກ່ຽວຂ້ອງກັບຄວາມຮ້ອນໃນໄລຍະສອງເດືອນຜ່ານມາ.
