ທ່ານ ຢາຕໍເລາະ ເປັນປະທານພິທີສົບທ່ານ ໄຣຊີ ຊາວອີຣານທົ່ວທຸກສາລະທິດຮ່ວມອາໄລ

     ຜູ້ນໍາສູງສຸດອີຣານ ເປັນປະທານພິທີສົບປະທານາທິບໍດີ ທີ່ເສຍຊີວິດຈາກອຸປະຕິເຫດເຮລິກອບເຕີຕົກ ທ່າມກາງປະຊາຊົນຈາກທົ່ວທຸກສາລະທິດຫລັ່ງໄຫລມາຮ່ວມອາໄລ.

     ວັນທີ 22 ພຶດສະພາ, ສໍານັກຂ່າວຕ່າງປະເທດລາຍງານວ່າ: ທ່ານ ຢາຕໍເລາະ ອາລີ ຄາເມເນອີ ຜູ້ນໍາສູງສຸດຂອງອີຣານ ເປັນປະທານໃນພິທີສົບຂອງຜູ້ເສຍຊີວິດທັງ 8 ທ່ານ ຈາກອຸປະຕິເຫດເຮລິກອບເຕີຕົກ ຢູ່ແຂວງອາເຊີໄບຈານຕາເວັນອອກ ເຊິ່ງຢູ່ທາງຕາເວັນຕົກສຽງເໜືອຂອງປະເທດ ໃນວັນທີ 19 ພຶດສະພາຜ່ານມາ.

      ຜູ້ເສຍຊີວິດລວມມີ ປະທານາທິບໍດີ ອິບຣາຮິມ ໄຣຊີ ເຊິ່ງຫລາຍຝ່າຍເຊື່ອວ່າໄດ້ຮັບການວາງຕົວໃຫ້ຂຶ້ນສູ່ຕໍາແໜ່ງຜູ້ນໍາສູງສຸດເປັນຄົນຕໍ່ໄປ ແລະ ທ່ານ ຮໍເຊັນ ເອເມຍ-ອັບໂດລາຮຽນ ລັດຖະມົນຕີການຕ່າງປະເທດ ໂດຍພິທີສົບເກີດຂຶ້ນຢູ່ມະຫາວິທະຍາໄລເຕຫະຣານ ໃນນະຄອນຫລວງເຕຫະຣານ ທ່າມກາງປະຊາຊົນນັບແສນຈາກທົ່ວປະເທດ ເຊິ່ງເດີນທາງມາຮ່ວມໄວ້ອາໄລ.

     ທ່ານ ຄາເມເນອີ ປະກາດໄວ້ອາໄລທົ່ວປະເທດເປັນເວລາ 5 ວັນ ນັບແຕ່ວັນທີ 20 ພຶດສະພາຜ່ານມາ ແລະ ມອບໝາຍໃຫ້ທ່ານ ໂມຮໍາເໝັດ ມອກເບີ ຮັກສາການປະທານາທິບໍດີ ກຽມຈັດການເລືອກຕັ້ງປະທານາທິບໍດີຄັ້ງໃໝ່ ພາຍໃນໄລຍະເວລາ 50 ວັນ ຕາມລະບຸຢູ່ໃນລັດຖະທໍາມະນູນ ເຊິ່ງສື່ຂອງອີຣານລາຍງານວ່າ: ຈະເກີດຂຶ້ນໃນວັນທີ 28 ມິຖຸນາ.

      ຂະນະດຽວກັນ, ລັດຖະບານອີຣານແຕ່ງຕັ້ງທ່ານ ອາລີ ບາເກຣີ ນັກການທູດອາວຸໂສ ເຊິ່ງເຄີຍດໍາລົງຕໍາແໜ່ງຮອງລັດຖະມົນຕີການຕ່າງປະເທດ ໃນຍຸກຂອງທ່ານ ເອເມຍ-ອັບໂດລາຮຽນ ແລະ ເຄີຍປະຕິບັດໜ້າທີ່ຜູ້ແທນເຈລະຈານິວເຄຼຍຂອງລັດຖະບານເຕຫະຣານ ໃຫ້ຮັກສາການໃນຕໍາແໜ່ງລັດຖະມົນຕີການຕ່າງປະເທດ.