UNWTO ເຜີຍ ທ່ອງທ່ຽວຕ່າງແດນ ຟື້ນຕົວໃນໄຕມາດທໍາອິດ
ວັນທີ 21 ພຶດສະພາ, ອົງການການທ່ອງທ່ຽວໂລກແຫ່ງສະຫະປະຊາຊາດ (UNWTO) ລາຍງານວ່າ: ການເດີນທາງຂອງນັກທ່ອງທ່ຽວນາໆຊາດໃນໄຕມາດທໍາອິດ (ເດືອນມັງກອນ-ເດືອນມີນາ) ຂອງປີ 2024 ເພີ່ມຂຶ້ນເປັນ 97% ຂອງໄລຍະກ່ອນເກີດພະຍາດລະບາດໃຫຍ່ ໂດຍໂຕເລກດັ່ງກ່າວຂອງປີນີ້ມີທ່າອ່ຽງສູງເກີນໂຕເລກຂອງປີ 2019.
ລາຍງານລະບຸວ່າ: ຈໍານວນນັກທ່ອງທ່ຽວທີ່ເດີນທາງລະຫວ່າງປະເທດໃນໄຕມາດທໍາອິດຂອງປີນີ້ມີທັງໝົດ 285 ລ້ານຄົນ ເຊິ່ງເພີ່ມຂຶ້ນປະມານ 20% ເມື່ອທຽບໃສ່ໄລຍະດຽວກັນຂອງປີ 2023 ໂດຍອົງການການທ່ອງທ່ຽວໂລກຄາດຄະເນວ່າ: ການທ່ອງທ່ຽວລະຫວ່າງປະເທດຈະຟື້ນຕົວຢ່າງເຕັມຮູບແບບໃນໄລຍະເວລາທີ່ເຫລືອຂອງປີນີ້ ແລະ ຈໍານວນການເດີນທາງຈະສູງກວ່າປີ 2019 ປະມານ 2%.
ການເດີນທາງລະຫວ່າງປະເທດໃນພາກພື້ນອາຊີປາຊີຟິກເພີ່ມຂຶ້ນ ໂດຍການເດີນທາງດັ່ງກ່າວໃນໄຕມາດທໍາອິດຂອງປີ 2023 ຄິດເປັນ 65% ຂອງປີ 2019 ແລະ ເພີ່ມຂຶ້ນເປັນ 82% ໃນໄຕມາດທໍາອິດຂອງປີນີ້. ຂະນະດຽວກັນ ການເດີນທາງລະຫວ່າງປະເທດໃນພາກພື້ນຕາເວັນອອກກາງເຕີບໃຫຍ່ແຂງແກ່ນໃນອັດຕາເພີ່ມຂຶ້ນ 36% ຈາກໄລຍະກ່ອນເກີດພະຍາດລະບາດໃຫຍ່.
ສ່ວນທະວີບເອີຣົບຮັບຮອງນັກທ່ອງທ່ຽວນາໆຊາດໃນໄຕມາດທໍາອິດຂອງປີນີ້ທັງໝົດ 120 ລ້ານຄົນ ເພີ່ມຂຶ້ນ 1% ຈາກປີ 2019. ຂະນະທີ່ທະວີບອາຟຣິກາຮັບຮອງນັກທ່ອງທ່ຽວນາໆຊາດເພີ່ມຂຶ້ນ 5% ເມື່ອທຽບໃສ່ໄລຍະດຽວກັນຂອງປີ 2023 ແລະ ທະວີບອາເມລິກາຮັບຮອງນັກທ່ອງທ່ຽວນາໆຊາດສູງເຖິງ 99% ຂອງປີ 2019.
ທ່ານ ຊູຣັບ ໂປໂລລິຄາຊວິລີ ເລຂາທິການອົງການການທ່ອງທ່ຽວໂລກ ກ່າວເຖິງຜົນກະທົບທາງບວກຂອງການເດີນທາງທ່ອງທ່ຽວລະຫວ່າງປະເທດຕໍ່ເສດຖະກິດທ້ອງຖິ່ນ ຊີ້ວ່າການຟື້ນຕົວຂອງການທ່ອງທ່ຽວລະຫວ່າງປະເທດເປັນຂ່າວດີສໍາລັບເສດຖະກິດ ແລະ ປະຊາຊົນຫລາຍລ້ານຄົນ. ພ້ອມເນັ້ນເຖິງການຍົກລະດັບຄວາມຍືນຍົງ ແລະ ການຄວບຄຸມຂະນະແກ້ໄຂຜົນກະທົບຕໍ່ຊັບພະຍາກອນ ແລະ ຊຸມຊົນທ້ອງຖິ່ນ.
ລາຍໄດ້ຂອງການສົ່ງອອກຈາກການທ່ອງທ່ຽວລະຫວ່າງປະເທດ ເຊິ່ງລວມລາຍຮັບ ແລະ ການຂົນສົ່ງຜູ້ໂດຍສານ ໃນປີ 2023 ລວມມີ 1,7 ພັນລ້ານໂດລາສະຫະລັດ ປະມານ 96% ຂອງໄລຍະກ່ອນເກີດພະຍາດລະບາດໃຫຍ່ໃນທາງມູນຄ່າທີ່ແທ້ຈິງ ໂດຍລວມຍອດຜະລິດຕະພັນທາງກົງດ້ານການທ່ອງທ່ຽວ (TDGDP) ຟື້ນຕົວສູ່ລະດັບກ່ອນເກີດພະຍາດໃຫຍ່ 3,3 ພັນລ້ານໂດລາສະຫະລັດ ໃນປີ 2023 ຫລື ທຽບເທົ່າ 3% ຂອງລວມຍອດຜະລິດຕະພັນທົ່ວໂລກ.
