Qualcomm ປະສົບຄວາມສໍາເລັດໃນການທົດສອບສັນຍານ 5G ໃນມືຖືແລ້ວ ຄວາມໄວລະດັບ Gigabit
ໃກ້ເຂົ້າໄປອີກກ້າວກັບການເຊື່ອມຕໍ່ສັນຍານ 5G ຜ່ານໂທລະສັບມືຖື ເມື່ອຜູ້ຜະລິດຊິບຊື່ດັງເຊັ່ນ Qualcomm ອອກມາປະກາດວ່າ: ປະສົບຜົນສໍາເລັດໃນການທົດສອບເຊື່ອມຕໍ່ສັນຍານ 5G ຜ່ານອຸປະກອນເຄື່ອນທີ່ ດ້ວຍການໃຊ້ຊິບໂມເດມຮຸ່ນ X50 ທີ່ມີການເປີດຕົວຄັ້ງທໍາອິດໃນປີຜ່ານ ເຊິ່ງການສື່ສານຂໍ້ມູນ 5G ຜ່ານຄື່ນຄວາມຖີ່ 28 GHz ທີ່ມີຄວາມຍາວຄື່ນໃນລະດັບມິນລີແມັດ ແລະ ທາງ Qualcomm ຍັງບອກອີກວ່າ: ໂມເດມ X50 ນີ້ສາມາດເຮັດຄວາມໄວໃນການຖ່າຍໂອນຂໍ້ມູນໄດ້ເຖິງລະດັບ Gigabit ໃນລະຫວ່າງການທົດສອບ ແລະ ຈະສາມາດເຮັດຄວາມໄວໄດ້ສູງເຖິງ 5 Gbps (Gigabit ຕໍ່ວິນາທີ) ເມື່ອມີການວາງເຄືອຂ່າຍ 5G ສໍາເລັດສົມບູນ.
ນອກຈາກນີ້ ທາງ Qualcomm ຍັງໄດ້ປະກາດແນວທາງການອອກແບບໂທລະສັບທີ່ຈະຮອງຮັບການເຊື່ອມຕໍ່ 5G ເຊິ່ງຈະໃຊ້ໂມເດມ 5G ລວມເຖິງຄື້ນຄວາມຖີ່ເຄືອຂ່າຍ ແລະ ໃນສ່ວນຂອງຜູ້ຜະລິດໂທລະສັບ ຄາດວ່າຈະມີການນໍາສະເໜີໂທລະສັບມືຖື 5G ໃນເຄິ່ງທໍາອິດຂອງປີ 2019 ໂດຍເຄື່ອງມືຖືຕົ້ນແບບທີ່ຮອງຮັບ 5G ມີຄວາມໜາ 9 ມມ, ຈໍພາບແບບໄຮ້ຂອບ ເຊິ່ງເບິ່ງຈະເປັນມາດຕະຖານທົ່ວໆໄປຂອງໂທລະສັບໃນຍຸກປັດຈະບັນ.
ແລະ ເພື່ອໃຫ້ໂມເດມ X50 ສາມາດເຮັດວຽກໄດ້ໃນເຄື່ອງໂທລະສັບ ກໍຕ້ອງມີການອອກແບບເສົາອາກາດໃໝ່ສໍາລັບຄື້ນຄວາມຖີ່ມີຄວາມຍາວລະດັບມິນລິແມັດ ເຊິ່ງເປັນເສົາອາກາດທີ່ມີຂະໜາດນ້ອຍຫຼາຍ ແລະ ສາມາດໃສ່ເສົາອາກາດທີ່ມີຂະໜາດນ້ອຍນີ້ລົງໃນໂທລະສັບໄດ້ເຖິງ 2 ອັນ ເຊິ່ງເປັນຄື້ນຄວາມຖີ່ໄລຍະສັ້ນທີ່ສຸດເທົ່າທີ່ເຄີຍມີການໃຊ້ມາ.
ລາຍລະອຽດເລັກໜ້ອຍ ກ່ຽວກັບຄື້ນຄວາມຖີ່ 4G ທີ່ເຮົາໃຊ້ກັນຢູ່ໃນປັດຈຸບັນ ໃນປີ 2008 ໜ່ວຍງານ International Telecommunications Union-Radio communications sector (ITU-R) ໄດ້ກໍານົດສະເປັກມາດະຖານການເຊື່ອມຕໍ່ສັນຍານ 4G ເອົາໄວ້ທີ່ຄ່າຄວາມສູງສຸດ 100 Mbps (ເມກະບິຕຕໍ່ວິນາທີ) ສໍາລັບການໃຊ້ໃນຍານພາຫະນະທີ່ເຄື່ອນທີ່ດ້ວຍຄວາມໄວສູງເຊັ່ນ ໃນລົດຍົນ ຫຼື ລົດໄຟ ແລະ ກໍານົດຄວາມໄວສູງສຸດເອົາໄວ້ທີ່ 1 Gbps (Gigabit ຕໍ່ວິນາທີ) ສໍາລັບຄົນຍ່າງ ຫຼື ການໃຊ້ແບບປະຈໍາທີ່.
