ພຽງຢາງສົ່ງຈົດໝາຍເຕືອນອົດສະຕຣາລີ ບໍ່ຄວນຕາມອາເມລິກາ
ສປປ ເກົາຫລີ ສົ່ງໜັງສືເຖິງລັດຖະບານອົດສະຕຣາລີວ່າ: ລັດຖະບານແຄນເບີຣາບໍ່ຄວນເຂົ້າໄປກ່ຽວຂ້ອງກັບນະໂຍບາຍເລື່ອງແຫລມເກົາຫລີຂອງອາເມລິກາ.
ສຳນັກຂ່າວຕ່າງປະເທດລາຍງານຈາກເມືອງຊິດນີ ປະເທດອົດສະຕຣາລີ ໃນວັນທີ 20 ຕຸລາວ່າ: ໜັງສືພິມຊິດນີ ມໍນິງ ເຮີຣັດ ສະບັບວັນທີ 20 ຕຸລາ ໄດ້ພິມສຳເນົາໜັງສືຣາຊະການທີ່ມີຫົວຂໍ້ວ່າ: “ຈົດໝາຍເຖິງລັດຖະສະພາບັນດາປະເທດ” ເຊິ່ງໜຶ່ງໃນນັ້ນສົ່ງເຖິງລັດຖະສະພາຢູ່ນະຄອນຫລວງແຄນເບີຣາ ຊື່ຜູ້ລົງລາຍເຊັນຄືສະຖານເອກອັກຄະລາຊະທູດ ສປປ ເກົາຫລີ ປະຈຳນະຄອນຫລວງຈາກາຕາ ເຖິງສະຖານເອກອັກຄະລາຊະທູດອົດສະຕຣາລີປະຈຳນະຄອນຫລວງຈາກາຕາເຊັ່ນກັນ.
Exclusive: Julie Bishop reveals 'unprecedented' letter from North Korea, says pressure is working https://t.co/vTAVLs7A5j | @jamesmassola
— The Sydney Morning Herald (@smh) October 19, 2017
ສຳລັບເນື້ອໃນສຳຄັນໃນຈົດໝາຍສະບັບດັ່ງກ່າວ ເຊິ່ງລົງວັນທີ 28 ກັນຍາຜ່ານມາ ລະບຸວ່າ: ຖ້າປະທານາທິບໍດີ ໂດນັນ ທຣຳ ຄິດວ່າສາມາດກຳຈັດ ສປປ ເກົາຫລີ ໄດ້ຈາກຄຳຂົ່ມຂູ່ເຮັດສົງຄາມນິວເຄຼຍ “ຄືການຕີລາຄາສະຖານະການຜິດພາດຫລາຍ”. ດ້ວຍເຫດນີ້ ລັດຖະບານທີ່ຮັກໃນເສລີພາບ, ສັນຕິພາບ ແລະ ຄວາມຍຸຕິທຳ ຈຶ່ງຄວນຖອນຕົວອອກຈາກການສະໜັບສະໜູນການກະທຳດັ່ງກ່າວຂອງຜູ້ນຳອາເມລິກາ ທີ່ພວມພະຍາຍາມນຳພາໂລກໃຫ້ພົບກັບສົງຄາມນິວເຄຼຍ.
ຂະນະທີ່ທ່ານນາງ ຈູລີ ບິຊອບ ລັດຖະມົນຕີກະຊວງການຕ່າງປະເທດອົດສະຕຣາລີ ກ່າວວ່າ: ລັດຖະບານແຄນເບີລາອະນຸຍາດໃຫ້ຊິດນີ ມໍນິງ ເຮີຣັດ ຕີພິມສຳເນົາຈົດໝາຍສະບັບນັ້ນ ເຊິ່ງຖືເປັນການສື່ສານ “ທີ່ບໍ່ເຄີຍເກີດຂຶ້ນມາກ່ອນ” ລະຫວ່າງລັດຖະບານພຽງຢາງກັບອົດສະຕຣາລີ ແລະ ບັນດາປະເທດ.
ທັງນີ້, ທ່ານ ທຣຳ ກ່າວຖະແຫລງຕໍ່ກອງປະຊຸມສະມັດຊາສະຫະປະຊາຊາດ (UN) ຢູ່ນະຄອນນິວຢອກ ໃນເດືອນກັນຍາຜ່ານມາ ປະກາດຄວາມພ້ອມທາງທະຫານຂອງອາເມລິກາໃນການ “ທຳລາຍລ້າງ” ສປປ ເກົາຫລີ ເຊິ່ງເປັນປະເທດທີ່ຢູ່ພາຍໃຕ້ການປົກຄອງຂອງ “ມະນຸດຈະຫລວດ” ຖ້າເຖິງເວລາທີ່ອາເມລິກາຕ້ອງປ້ອງກັນຕົນເອງ, ສ້າງຄວາມບໍ່ພໍໃຈຢ່າງໜັກໃຫ້ແກ່ລັດຖະບານພຽງຢາງ ເຖິງຂັ້ນທີ່ທ່ານ ກິມ ຈອງ ອິນ ຜູ້ນຳສູງສຸດ ອອກຖະແຫລງການດ້ວຍຕົນເອງເປັນເທື່ອທຳອິດ ປະນາມທ່ານ ທຣຳ ແລະ ອາເມລິກາຕ້ອງຊົດໃຊ້ເລື່ອງນີ້ຢ່າງສາສົມ.
