ເມືອງຊຽງຄໍ້ ທຳລາຍສິນຄ້າໝົດອາຍຸ

ວັນທີ 21 ພຶດສະພາ 2024ນີ້, ຄະນະຄວບຄຸມອາຫານ ແລະ ຢາ ເມືອງຊຽງຄໍ້, ແຂວງຫົວພັນໄດ້ທຳລາຍສິນຄ້າ ອຸປະໂພກ ບໍລິໂພກ ທີ່ໝົດອາຍຸ, ສິນຄ້າເສື່ອມຄຸນນະພາບຫຼາຍລາຍການ ມູນຄ່າ 5.000.000 ກວ່າກີບ ຢູ່ທີ່ສະໜາມຂີ້ເຫຍື້ອເມືອງ.

ເຄື່ອງທີ່ນຳມາທຳລາຍໃນຄັ້ງນີ້ລວມມີ ນ້ຳອັດລົມ, ນົມ, ເຄື່ອງດື່ມຊູກຳລັງ, ໝີ່,ເຂົ້າໜົມ ແລະ ປະເພດເຄື່ອງສຳອາງເຊັ່ນ: ສະບູ , ແປ້ງ, ຄີຣມ ທີ່ຄະນະຄວບຄຸມອາຫານ ແລະ ຢາເມືອງ ໄດ້ລົງກວດກາຕາມຮ້ານຂາຍສົ່ງ ແລະ ຂາຍຍ່ອຍຕ່າງໆທົ່ວເມືອງຊຽງຄໍ້ ທັງໝົດ 150 ແຕ່ວັນທີ 28 ມີນາ ຫາວັນທີ 11 ເມສາ ຜ່ານມາ,  

ນີ້ແມ່ນປະຕິບັດຕາມພາລະບົດບາດ, ສິດ ແລະ ໜ້າທີ່ຄວາມຮັບຜິດຊອບຂອງຕົນບົນພື້ນຖານຂອງນິຕິກຳທີ່ລະບຸໄວ້ ທັງເປັນການຮັບປະກັນຜົນປະໂຫຍດອັນຊອບທຳ, ຄວາມປອດໄພທາງດ້ານສຸຂະພາບຂອງຜູ້ບໍລິໂພກ ໃຫ້ໄດ້ຊົມໃຊ້ສິນຄ້າທີ່ມີຄຸນນະພາບ ໄດ້ມາດຕະຖານ ມີຜົນດີຕໍ່ສຸຂະພາບ.