ສິງກະໂປແອຣລາຍ ແຈກໂບນັດ 8 ເດືອນໃຫ້ພະນັກງານ ສະຫລອງກໍາໄລສູງເຖິງ 1.980 ລ້ານໂດລາ

     ບໍລິສັດເຈົ້າຂອງຕໍາແໜ່ງ “ສາຍການບິນດີທີ່ສຸດໃນໂລກ” ກຽມຈ່າຍເງິນໂບນັດປະຈໍາປີປະມານ 8 ເທົ່າຂອງເງິນເດືອນໃຫ້ພະນັກງານ ຫລັງຈາກສ້າງກໍາໄລສຸດທິປະຈໍາປີໄດ້ສູງເຖິງ 1.980 ລ້ານໂດລາ.

     ແຫລ່ງຂ່າວວົງໃນເປີດເຜີຍຕໍ່ສໍານັກຂ່າວ CNN ໃນວັນທີ 17 ພຶດສະພາຜ່ານມາວ່າ: ສາຍການບິນສິງກະໂປແອຣລາຍ ກຽມຈ່າຍເງິນໂບນັດປະຈໍາປີໃຫ້ພະນັກງານສະເລ່ຍປະມານ 8 ເທົ່າຂອງເງິນເດືອນ ຫລັງຈາກວັນທີ 15 ພຶດສະພາ 2024 ບໍລິສັດລາຍງານຕົວເລກຂອງຜົນກໍາໄລສຸດທິໃນປີງົບປະມານ 2023-2024 ສູງເຖິງ 1.980 ລ້ານໂດລາສະຫະລັດ.

      ສໍາລັບເງິນໂບນັດຈໍານວນນີ້ ແບ່ງເປັນເງິນໂບນັດ 6,65 ເດືອນ ແລະ ເພີ່ມອີກ 1,5 ເດືອນ ເປັນເງິນຊ່ວຍເຫລືອສໍາລັບໄລຍະທີ່ມີສະຖານະການໂຄວິດ-19 ລະບາດ.

      ສິງກະໂປ ແອຣລາຍ ໄດ້ຮັບລາງວັນ “ສາຍການບິນດີທີ່ສຸດໃນໂລກ” ໃນປີຜ່ານມາ ຈາກການຄັດເລືອກຂອງ Skytraz World Airline Awards ເຊິ່ງໄດ້ຮັບລາງວັນນີ້ເປັນຄັ້ງທີ 5 ຂອງບໍລິສັດໃນໄລຍະເວລາ 23 ປີທີ່ມີການປະກາດລາງວັນດັ່ງກ່າວ.

     ຜູ້ບໍລິຫານຂອງສິງກະໂປ ແອຣລາຍ ກ່າວວ່າ: ລາງວັນນີ້ມາຈາກການເຮັດວຽກຢ່າງໜັກຂອງທີມງານທີ່ຍອມເສຍສະຫລະເພື່ອໃຫ້ ສິງກະໂປແອຣລາຍ ພ້ອມຈະຟື້ນຕົວໃນທຸລະກິດການເດີນທາງທາງອາກາດ ເຊິ່ງເຮັດໃຫ້ບໍລິສັດຫວນຄືນວົງການຢ່າງເຂັ້ມແຂງ ແລະ ແຂງແກ່ນກວ່າເກົ່າ ຫລັງຈາກຜ່ານພົ້ນສະຖານະການໂຄວິດ-19 ລະບາດທົ່ວໂລກ.

     ນອກຈາກສິງກະໂປ ແອຣລາຍແລ້ວ ຍັງມີສາຍການບິນເອມິເຣດແຫ່ງດູໄບ ທີ່ແຈກໂບນັດໃຫ້ພະນັກງານຈາກອັດຕາເງິນເດືອນ 20 ອາທິດ ຫລື ປະມານ 5 ເທົ່າຂອງເງິນເດືອນ.