ເຮລິກອບເຕີປະທານາທິບໍດີອີຣານຕົກ ຍັງບໍ່ຮູ້ຊະຕາກໍາ
ເຈົ້າໜ້າທີ່ອີຣານຢືນຢັນຕໍ່ສໍານັກຂ່າວຕ່າງປະເທດຫລາຍສໍານັກວ່າ: ເຮລິກອບເຕີເຊິ່ງມີທ່ານ ອິບຣາຮິມ ໄຣຊີ ປະທານາທິບໍດີອີຣານ ແລະ ທ່ານ ຮໍເຊນ ອາມີ-ອັບດຸລລາຣຽນ ລັດຖະມົນຕີຕ່າງປະເທດ ເປັນໜຶ່ງໃນຜູ້ໂດຍສານ ປະສົບອຸປະຕິເຫດ ຂະນະເດີນທາງກັບຈາກການຢ້ຽມຢາມເຂດຊາຍແດນຕິດກັບອາເຊີໄບຈານ ທ່າມກາງສະພາບອາກາດບໍ່ຄ່ອຍດີ ແລະ ມີໝອກໜາ, ເບື້ອງຕົ້ນຍັງບໍ່ຮູ້ຊະຕາກໍາຂອງພວກທ່ານທັງໝົດ.
ໂດຍສື່ທ້ອງຖິ່ນອີຣານລາຍງານວ່າ: ຂະນະເກີດເຫດມີຄົນຢູ່ໃນເຮລິກອບເຕີລໍາດັ່ງກ່າວທັງໝົດ 9 ຄົນ ໄດ້ແກ່ ປະທານາທິບໍດີອີຣານ, ລັດຖະມົນຕີຕ່າງປະເທດ, ເຈົ້າແຂວງອາເຊີໄບຈານຕາເວັນອອກ, ອິໝ່າມ, ນັກບິນ, ຜູ້ຊ່ວຍນັກບິນ ແລະ ຫົວໜ້າລູກເຮືອ ລວມທັງທີມຮັກສາຄວາມປອດໄພອີກ 2 ຄົນ.
ທາງການຕວກກີໃຊ້ໂດຣນກວດຫາຈຸດເກີດເຫດ ແລະ ກວດພົບ “ຈຸດຄວາມຮ້ອນ” ທີ່ຄາດວ່າຈະເປັນຈຸດທີ່ເຮລິກອບເຕີຕົກຢູ່ບໍລິເວນພູຢູ່ແຂວງອາເຊີໄບຈານຕາເວັນອອກ ກ່ອນຈະແຊຣຂໍ້ມູນດັ່ງກ່າວໃຫ້ລັດຖະບານອີຣານເລັ່ງສົ່ງທີມກູ້ໄພເຂົ້າໄປພື້ນທີ່ເກີດເຫດ.
ຂະນະທີ່ທາງການຣັດເຊຍປະກາດສົ່ງເຮືອບິນ ແລະ ທີມກູ້ໄພ 50 ຄົນ ຊ່ວຍເຫລືອລັດຖະບານອີຣານຄົ້ນຫາເຮລິກອບເຕີລໍາດັ່ງກ່າວແລ້ວ, ແຕ່ເນື່ອງຈາກສະພາບອາກາດທີ່ມີໝອກໜາ ເຮັດໃຫ້ການເຂົ້າເຖິງຈຸດເກີດເຫດເປັນໄປດ້ວຍຄວາມຍາກລໍາບາກ.
ຜູ້ນໍາ ແລະ ຜູ້ແທນລັດຖະບານໃນຫລາຍປະເທດຕ່າງສົ່ງຂໍ້ຄວາມໃຫ້ກໍາລັງໃຈອີຣານໃຫ້ກ້າວຂ້າມໄລຍະເວລາທີ່ຍາກລໍາບາກນີ້ໄປໃຫ້ໄດ້, ພ້ອມພາວະນາໃຫ້ປະທານາທິບໍດີອີຣານ ລວມທັງຄົນອື່ນໆຢູ່ໃນເຮລິກອບເຕີລໍາດັ່ງກ່າວປອດໄພ.
ອຸປະຕິເຫດຄັ້ງນີ້ເກີດຂຶ້ນກັບເຮລິກອບເຕີລໍາໜຶ່ງຈາກທັງໝົດ 3 ລໍາໃນຄະນະທີ່ຮ່ວມເດີນທາງໄປນໍາ, ສ່ວນເຮລິກອບເຕີອີກ 2 ລໍາລົງຈອດໄດ້ຢ່າງປອດໄພ.
ໂດຍປະທານາທິບໍດີ ໄຣຊີ ອາຍຸ 63 ປີ ໄດ້ຮັບເລືອກເປັນປະທານາທິບໍດີອີຣານໃນປີ 2021 ທ່ານເປັນນັກບວດທີ່ເຄັ່ງຂັດໃນຫລັກສາສະໜາ ແລະ ໄດ້ຮັບການຍົກຍ້ອງວ່າເປັນຜູ້ສືບທອດຕໍາແໜ່ງຕໍ່ຈາກທ່ານ ຢາຕໍເລາະ ຄາເມເນອີ ຜູ້ນໍາສູງສຸດຂອງອີຣານທີ່ປົກຄອງປະເທດມາແຕ່ປີ 1989.
ອ້າງອີງ:
- https://www.bbc.com/news/live/world-middle-east-69035051/page/2
- https://edition.cnn.com/middleeast/live-news/raisi-iran-president-helicopter-crash/index.html
- https://www.aljazeera.com/news/liveblog/2024/5/19/iran-helicopter-accident-live-president-fm-on-missing-aircraft
