ຄະນະປະຈຳສະພາແຫ່ງຊາດຫວຽດນາມ ລົງຄະແນນສຽງໃຫ້ທ່ານ ນາງ ເຈືອງຖິ ມາຍ ລາອອກການເປັນສະມາຊິກສະພາແຫ່ງຊາດຊຸດທີ 15

ໜັງສືພິມ VnExpress ຂອງຫວຽດນາມ ລາຍງານ ວັນທີ 16 ພຶດສະພາ 2024 ນີ້ວ່າ: ຄະນະປະຈຳສະພາແຫ່ງຊາດໄດ້ຄົ້ນຄວ້າປະກອບຄຳຄິດຄຳເຫັນ ແລະ ລົງຄະແນນສຽງປິດລັບ ແລະ ເຜີຍຂໍ້ຕົກລົງເລກທີ 1053 ວ່າດ້ວຍການໃຫ້ຢຸດຕິປະຕິບັດໜ້າທີ່ເປັນສະມາຊິກສະພາແຫ່ງຊາດຊຸດທີ 15 ຂອງທ່ານ ນາງ ເຈືອງຖິ ມາຍ.

ທ່ານ ນາງ ເຈືອງຖິ ມາຍ ເປັນສະມາຊິກສະພາແຫ່ງຊາດແຂວງ ຮວາບິ໋ງ, ເປັນກຳມະການກົມການເມືອງ, ເລຂາທິການສູນກາງພັກ, ຫົວໜ້າຂົນຂວາຍຂອງສູນກາງ ໄດ້ລະເມີດຂໍ້ຫ້າມຂອງສະມາຊິກພັກ, ບໍ່ມີຄວາມເປັນແບບຢ່າງຂອງພະນັກງານ ສະມາຊິກພັກ, ໂດຍສະເພາະແມ່ນຄວາມບໍ່ເປັນແບບຢ່າງຂອງກຳມະການກົມການເມືອງ, ເລຂາທິການ, ກຳມະການສູນກາງພັກ ໄດ້ສົ່ງຜົນກະທົບຕໍ່ບົດບາດອິດທິພົນຂອງພັກ ແລະ ຂອງຕົນເອງ. ໂດຍຮັບຮູ້ຕໍ່ຄວາມຜິດຂອງຕົນຕໍ່ພັກ ຕໍ່ປະຊາຊົນ, ຜູ້ກ່ຽວຈຶ່ງໄດ້ຂຽນໃບລາອອກເພື່ອພັກຜ່ອນເຂົ້າຮັບບຳນານ.