ອັດຕະປື ອະນຸຍາດໃຫ້ເອກະຊົນ ລົງທຶນສ້າງຕັ້ງໂຮງງານຜະລິດແປ້ງມັນຕົ້ນ ຢູ່ເຂດດິນອຸດສາຫະກຳຫລັກ 17 ໃນເນື້ອທີ່ດິນ 19 ເຮັກຕາ
ວັນທີ 14 ພຶດສະພາ 2024 ນີ້, ອົງການປົກຄອງແຂວງ ອັດຕະປື ໄດ້ເຊັນສັນຍາອະນຸຍາດໃຫ້ບໍລິສັດ ແປ້ງມັນຕົ້ນ ລາວ-ຫວຽດ ຈໍາກັດຜູ້ດຽວ ລົງທຶນສ້າງຕັ້ງໂຮງງານຜະລິດແປ້ງມັນຕົ້ນ ຢູ່ເຂດດິນອຸດສາຫະກຳ ຫລັກ 17, ບ້ານ ທາດພະໄຊ ເມືອງ ໄຊເສດຖາ, ໃນເນື້ອທີ່ດິນ 19 ເຮັກຕາ.
ການເຊັນສັນຍາພັດທະນາໂຄງການລົງທຶນສ້າງຕັ້ງໂຮງງານຜະລິດແປ້ງມັນຕົ້ນຄັ້ງນີ້ ເພື່ອພັດທະນາເສດຖະກິດຂອງແຂວງ ໃຫ້ມີການຂະຫຍາຍຕົວ ແລະ ສົ່ງເສີມການພັດທະນາວຽກງານກະສິກຳ ຢູ່ແຂວງ ອັດຕະປື ໃຫ້ມີການເຕີບໃຫຍ່ຂະຫຍາຍຕົວຂຶ້ນໄປເລື້ອຍໆ. ພ້ອມນີ້ກໍເພື່ອຜະລິດເປັນຜະລິດຕະພັນແປ້ງມັນຕົ້ນ ສົ່ງຂາຍພາຍໃນ ແລະ ຕ່າງປະເທດ, ເຊິ່ງໂຄງການສ້າງຕັ້ງໂຮງງານຜະລິດແປ້ງມັນຕົ້ນ ຢູ່ເຂດດິນອຸດສາຫະກຳ ຫລັກ 17, ບ້ານ ທາດພະໄຊ ເມືອງໄຊເສດຖາ ແຂວງ ອັດຕະປື ແຫ່ງນີ້ ຈະກາຍເປັນສະຖານທີ່ໃຫ້ແກ່ການສ້າງວຽກເຮັດງານທຳ ໃຫ້ປະຊາຊົນ ຢູ່ເຂດບ້ານ ທາດພະໄຊ ກໍຄືປະຊາຊົນ ຊາວເມືອງ ໄຊເສດຖາ ແລະ ທັງສາມາດສ້າງແຫລ່ງລາຍຮັບໃຫ້ແກ່ພາກລັດໄດ້ອີກທາງໜຶ່ງ.
ພິທີເຊັນສັນຍາຮ່ວມ ລະຫວ່າງ ທ່ານ ສູນນະຄອນ ແກ້ວວຽງຄຳ ຫົວໜ້າພະແນກແຜນການ ແລະ ການລົງທຶນແຂວງອັດຕະປື ແລະ ທ່ານ ຫງວຽນ ວັນ ຮຸ່ງ ບຸນປະເສີດ ສີລິວັດ ອຳນວຍການບໍລິສັດ ແປ້ງມັນຕົ້ນລາວ-ຫວຽດ ຈໍາກັດຜູ້ດຽວ.
