GDP ຈີນໄຕມາດ 3 ປີນີ້ ຂະຫຍາຍຕົວຕາມເປົ້າໝາຍ
ເສດຖະກິດຂອງຈີນ ເຊິ່ງມີຂະໜາດໃຫຍ່ເປັນອັນດັບ 2 ຂອງໂລກ ເຕີບໃຫຍ່ໃນລະດັບ 6,8% ໃນໄຕມາດທີ 3 ຂອງປີນີ້ ເຖິງວ່າຫລຸດລົງເລັກໜ້ອຍຈາກໄຕມາດທີ 2 ແຕ່ຍັງຖືວ່າເປັນໄປຕາມເປົ້າໝາຍ.
ສຳນັກຂ່າວຕ່າງປະເທດລາຍງານຈາກນະຄອນຫລວງປັກກິ່ງ ປະເທດຈີນ ໃນວັນທີ 19 ຕຸລາວ່າ: ສຳນັກງານສະຖິຕິແຫ່ງຊາດຈີນ (NBS) ອອກລາຍງານສະຖານະການທາງເສດຖະກິດຂອງປະເທດໃນໄຕມາດທີ 3 ຂອງປີນີ້ວ່າ: ລວມຍອດຜະລິດຕະພັນພາຍໃນ (GDP) ຂະຫຍາຍຕົວບັນລຸ 6,8%, ເຖິງວ່າຫລຸດລົງເລັກໜ້ອຍຈາກສະຖິຕິການຂະຫຍາຍຕົວຂອງ GDP ໄຕມາດທີ 2 ເຊິ່ງບັນລຸ 6,9% ແຕ່ຖືວ່າຍັງເປັນໄປຕາມເປົ້າໝາຍຂອງລັດຖະບານປັກກິ່ງ ເຊິ່ງຄາດຄະເນທ່າອ່ຽງການຂະຫຍາຍຕົວຂອງ GDP ໃນປີ 2017 ໄວ້ປະມານ 6,5%, ຫລັງ GDP ໃນປີຜ່ານມາເຕີບໃຫຍ່ໃນລະດັບ 6,7% ຕໍ່າທີ່ສຸດນັບແຕ່ປີ 1990.
China GDP increased 6.8% in the third quarter from a year earlier, matching the estimate in Bloomberg’s survey https://t.co/6cUpkescO1 pic.twitter.com/EC5RENCBBt
— Bloomberg Graphics (@BBGVisualData) October 19, 2017
ຖ້າທຽບໃສ່ເປັນແຕ່ລະໄຕມາດພົບວ່າອັດຕາການຂະຫຍາຍຕົວຂອງ GDP ໃນໄຕມາດທີ 3 ບັນລຸ 1,7% ຫລຸດລົງ 0,1% ຈາກໄຕມາດທີ 2 ເຊິ່ງຂະຫຍາຍຕົວ 1,8%, ສ່ວນຜົນຜະລິດຈາກອຸດສາຫະກຳໃນໄຕມາດທີ 3 ເຕີບໃຫຍ່ 6,6% ເມື່ອທຽບໃສ່ໄລຍະເວລາດຽວກັນຂອງປີຜ່ານມາ, ດີກວ່ານັກວິເຄາະຕີລາຄາກ່ອນໜ້ານີ້ ແລະ ການລົງທຶນໃນຊັບສິນຖາວອນເຊັ່ນ: ອະສັງຫາລິມະຊັບ ຂະຫຍາຍຕົວໃນລະດັບ 7,5% ລະຫວ່າງເດືອນມັງກອນ-ກັນຍາ ຖືວ່າຕໍ່າກວ່າການຄາດຄະເນ.
