ເອກະຊົນເຊັນສັນຍາສຳປະທານແຫລ່ງທ່ອງທ່ຽວອຸທະຍານນໍ້າຕົກຕາດແຊ ເນື້ອທີ່ດິນສໍາປະທານ 14 ເຮັກຕາ 247 ຕາແມັດ ອາຍຸສຳປະທານ 45 ປີ
ວັນທີ 10 ພຶດສະພາ 2024, ແຂວງຈຳປາສັກ ຈັດພິທີເຊັນສັນຍາສໍາປະທານ (CA) ໂຄງການແຫລ່ງທ່ອງທ່ຽວອຸທະຍານນໍ້າ ຕົກຕາດແຊ ທ້າວບາຈຽງ ເນື້ອທີ່ 14 ເຮັກຕາ, 247 ຕາແມັດ ບ້ານຫົວແຊ ເມືອງບາຈຽງຈະເລີນສຸກ, ແຂວງຈໍາປາສັກ ລະຫວ່າງ ອົງການປົກຄອງແຂວງຈຳປາສັກ ກັບ ບໍລິສັດ ຫົງຄໍາຂຸດຄົ້ນແຮ່- ຊາຍ ຈໍາກັດຜູ້ດຽວ.
ພິທີຈັດຂຶ້ນຢູ່ພະແນກແຜນການ ແລະ ການລົງທຶນແຂວງ ໂດຍການເຂົ້າຮ່ວມຂອງ ທ່ານ ສາຍທອງ ໄຊຍະວົງ ຮອງເລຂາພັກແຂວງ ປະທານສະພາປະຊາຊົນ ແຂວງຈໍາປາສັກ ແລະ ທ່ານ ສົມບູນ ເຮືອງວົງສາ ຮອງເຈົ້າແຂວງຈໍາປາສັກ.
ສັນຍາສຳປະທານປະກອບດ້ວຍ 20 ມາດຕາ, ອາຍຸການລົງທຶນ 45 ປີ, ມູນຄ່າການລົງທຶນທັງໝົດ 3.546.460 ໂດລາ ຫລື ປະມານ 75.887.151.080 ກີບ, ເນື້ອທີ່ດິນສໍາປະທານ 14 ເຮັກຕາ 247 ຕາແມັດ, ແບ່ງອອກເປັນ 3 ເຂດຄື: ເຂດທີ1: ເນື້ອທີ່ດິນສໍາປະທານ ພື້ນທີ່ເຂດອະນຸລັກ ພັດທະນາເປັນເຂດສີຂຽວ ເປັນຈຸດອະນຸລັກ ປ່າໄມ້ນາໆພັນ, ເຂດປ່າປ້ອງກັນ, ເຂດປູກປ່າໄມ້ທົດແທນ ແລະ ອື່ນໆ 64.854 ຕາແມັດ, ເຂດທີ2: ເນື້ອທີ່ດິນາສໍາປະທານ ພື້ນທີ່ດິນບໍລິເວນນໍ້າຕົກຕາດ, ບໍລິເວນນໍ້າຫ້ວຍຍາງ 30.179 ຕາແມັດ ແລະ ເຂດທີ3: ເນື້ອທີ່ດິນສໍາປະທານ ພື້ນທີ່ພັດທະນາທ່ອງທ່ຽວ 44,967 ຕາແມັດ.
