ກອງປະຊຸມສະພາຜູ້ບໍລິຫານສູນປະສານງານເພື່ອຊ່ວຍເຫລືອດ້ານມະນຸດສະທໍາອາຊຽນ ຄັ້ງທີ 7
ວັນທີ 18 ຕຸລານີ້, ຢູ່ທີ່ໂຮງແຮມຫລວງພະບາງວິວ ແຂວງຫລວງພະບາງ ໄດ້ຈັດກອງປະຊຸມສະພາຜູ້ບໍລິຫານສູນປະສານງານເພື່ອຊ່ວຍເຫລືອດ້ານມະນຸດສະທຳອາຊຽນ ຄັ້ງທີ 7 ໂດຍການເປັນປະທານຂອງທ່ານ ປະສົງ ວົງຄໍາຈັນ ຫົວໜ້າກົມສັງຄົມສົງເຄາະ ກະຊວງແຮງງານ ແລະ ສະຫວັດດີການສັງຄົມ, ປະທານສະພາບໍລິຫານຂອງສູນ AHA ແລະ ມີຄະນະຜູ້ແທນຈາກບັນດາປະເທດສະມາຊິກອາຊຽນ ທີ່ເປັນສະມາຊິກສະພາບໍລິຫານສູນ AHA, ສູນປະສານງານເພື່ອຊ່ວຍເຫລືອດ້ານມະນຸດຊະທຳອາຊຽນ (ສູນອາຮາ) ແລະ ກອງເລຂາອາຊຽນເຂົ້າຮ່ວມ.
ກອງປະຊຸມຄັ້ງນີ້ ໄດ້ປຶກສາຫາລື, ປະກອບຄຳເຫັນ ແລະ ຮັບຮອງເອົາບັນຫາທີ່ສຳຄັນດັ່ງນີ້: 1. ຮັບຟັງບົດລາຍງານຂອງຜູ້ບໍລິຫານສູນອາຮາກ່ຽວກັບການຈັດຕັ້ງປະຕິບັດແຜນງານຂອງສູນອາຮາ 2016-2020; 2. ການຈັດຕັ້ງປະຕິບັດຖະແຫລງການຂອງຜູ້ນຳອາຊຽນ ວ່າດ້ວຍຄວາມເປັນໜຶ່ງດຽວຂອງອາຊຽນໃນການຕອບໂຕ້ໄພພິບັດ; 3. ການຈັດຕັ້ງປະຕິບັດບັນດາໂຄງການ ແລະ ກິດຈະກຳຕ່າງໆພາຍໃຕ້ວິໄສທັດອາຊຽນ ວ່າດ້ວຍວຽກງານໄພພິບັດ 2025 ແລະ ແຜນງານຂອງສັນຍາອາຊຽນ ວ່າດ້ວຍການຄຸ້ມຄອງໄພພິບັດ ແລະ ຕອບໂຕ້ສຸກເສີນ 2016-2020. ນອກນີ້, ກອງປະຊຸມຍັງໄດ້ປຶກສາຫາລື ແລະ ກຳນົດທິດທາງໃນຕໍ່ໜ້າ ແລະ ການຈັດຕັ້ງປະຕິບັດໃຫ້ການຊ່ວຍເຫລືອດ້ານມະນຸດສະທຳ ແລະ ການບັນເທົາທຸກໄພພິບັດໃນອາຊຽນ ແລະ ນອກພາກພື້ນອາຊຽນ ໂດຍສະເພາະບົດບາດຂອງສູນອາຮາໃນການຈັດຕັ້ງປະບັດໜ້າທີ່ດັ່ງກ່າວ.
