ມອບ-ຮັບໜ້າທີ່ເລຂາທິການສະພາແຫ່ງຊາດ ຜູ້ເກົ່າ ແລະ ຜູ້ໃໝ່

ວັນທີ 7 ພຶດສະພາ 2024, ໄດ້ມີພິທີມອບ-ຮັບໜ້າທີ່ ເລຂາທິການສະພາແຫ່ງຊາດ, ລະຫວ່າງທ່ານ ລິນຄຳ ດວງສະຫວັນ ເລຂາທິການສະພາແຫ່ງຊາດ ຜູ້ເກົ່າ ກັບ ທ່ານ ນາງ ອຳໄພວອນ ລ້ອມບຸນແພງ ເລຂາທິການສະພາແຫ່ງຊາດ ຜູ້ໃໝ່, ຢູ່ສະພາແຫ່ງຊາດ ເຂົ້າຮ່ວມເປັນປະທານຂອງ ທ່ານ ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານຄະນະປະຈໍາ ຜູ້ຊີ້ນຳວຽກງານຄະນະເລຂາທິການສະພາແຫ່ງຊາດ.

ທ່ານ ລິນຄຳ ດວງສະຫວັນ ກຳມະການສຳຮອງສູນກາງພັກ, ເລຂາທິການສະພາແຫ່ງຊາດ (ຜູ້ເກົ່າ) ໄດ້ລາຍງານໂດຍສັງເຂບການປະຕິບັດໜ້າທີ່ຂອງຕົນໃນໄລຍະຜ່ານມາ ແລະ ຄາດຄະເນທິດທາງແຜນການຮອດປີ 2025 ພ້ອມທັງມອບໜ້າທີ່ໃຫ້ຜູ້ໃໝ່;  ທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ເລຂາທິການສະພາແຫ່ງຊາດ (ຜູ້ໃໝ່) ໄດ້ກ່າວຮັບໜ້າທີ່ ແລະ ໃຫ້ຄຳໝັ້ນໝາຍຈະຈັດຕັ້ງປະຕິບັດໜ້າທີ່ຢ່າງຕັ້ງໜ້າ ແລະ ດ້ວຍຄວາມຮັບຜິດຊອບສູງ  ພ້ອມທັງໄດ້ລົງນາມເອກະສານມອບ-ຮັບໜ້າທີ່ລະຫວ່າງເລຂາທິການສະພາແຫ່ງຊາດ ຜູ້ເກົ່າ ກັບ ຜູ້ໃໝ່ 

ທ່ານ ນາງ ສູນທອນ ໄຊຍະຈັກ ໄດ້ຮຽກຮ້ອງໃຫ້ບັນດາຄະນະນຳຂອງກົມ ກໍຄືພະນັກງານ-ລັດຖະກອນໃນຄະນະເລຂາທິການສະພາແຫ່ງຊາດ ຈົ່ງເພີ່ມທະວີີຄວາມສາມັກຄີເປັນຈິດໜຶ່ງໃຈດຽວພ້ອມກັບເລຂາທິການສະພາແຫ່ງຊາດຜູ້ໃໝ່ ບຸກບືນສູ້ຊົນຈັດຕັ້ງປະຕິບັດໜ້າທີ່ວຽກງານທີ່ຢູ່ໃນຂອບເຂດຄວາມຮັບຜິດຊອບຂອງຕົນ ໃຫ້ມີຜົນສໍາເລັດອັນໃໝ່, ມີຄຸນນະພາບ ແລະ ວ່ອງໄວທັນເວລາ; ເອົາໃຈໃສ່ເປັນໃຈກາງປະສານສົມທົບ ແລະ ຕິດຕາມຊຸກຍູ້ບັນດາກໍາມາທິການ ແລະ ພາກສ່ວນກ່ຽວຂ້ອງ ກະກຽມດ້ານເນື້ອໃນໃຫ້ແກ່ການດໍາເນີນກອງປະຊຸມສະພາແຫ່ງຊາດ, ກອງປະຊຸມຄະນະປະຈໍາສະພາແຫ່ງຊາດ; ເອົາໃຈໃສ່ສືບຕໍ່ການບໍາລຸງຍົກລະດັບວິຊາການດ້ານຕ່າງໆ ໃຫ້ແກ່ພະນັກງານ-ລັດຖະກອນຂອງຄະນະເລຂາ ທິການສະພາແຫ່ງຊາດ ຢ່າງເປັນປົກກະຕິຕໍ່ເນື່ອງ ເພື່ອເຮັດໃຫ້ການປະຕິບັດໜ້າທີ່ວຽກງານຂອງຄະນະເລຂາທິການສະພາແຫ່ງຊາດ ມີປະສິດທິຜົນ, ຕອບສະໜອງກັບຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່.