ເສດຖະກິດອິນໂດເນເຊຍເຕີບໃຫຍ່ 5,11% ໃນໄຕມາດທໍາອິດ

      ວັນທີ 6 ພຶດສະພາ, ສໍານັກງານສະຖິຕິຂອງອິນໂດເນເຊຍ (BPS) ເປີດເຜີຍວ່າ: ເສດຖະກິດຂອງອິນໂດເນເຊຍຂະຫຍາຍຕົວ 5,11 ເມື່ອທຽບໃສ່ປີຕໍ່ປີໃນໄຕມາດທໍາອິດ (ມັງກອນ-ມີນາ) ຂອງປີນີ້, ແຕ່ຫລຸດລົງ 0,83% ເມື່ອທຽບໃສ່ໄຕມາດກ່ອນໜ້າ.

      ທ່ານ ອາມາເລຍ ວິດຢາສັນຕິ ຮັກສາການຫົວໜ້າສໍານັກງານສະຖິຕິຂອງອິນໂດເນເຊຍ ລະບຸວ່າ: ຕົວເລກດັ່ງກ່າວຖືເປັນການເຕີບໃຫຍ່ຮອບໄຕມາດທໍາອິດສູງທີ່ສຸດນັບແຕ່ປີ 2015 ໂດຍອິນໂດເນເຊຍລາຍງານການເຕີບໃຫຍ່ 5,12% ໃນໄຕມາດທໍາອິດຂອງປີ 2014.

     ທ່ານ ວິດຢາສັນຕິ ລະບຸວ່າ: ຖ້າພິຈາລະນາໃນດ້ານການຜະລິດ ປັດໄຈຫລັກທີ່ສົ່ງເສີມການເຕີບໃຫຍ່ທາງເສດຖະກິດໃນໄລຍະເວລາດັ່ງກ່າວໄດ້ແກ່ ຂະແໜງການແປຮູບ, ຂະແໜງການຄ້າ, ຂະແໜງກໍ່ສ້າງ ແລະ ບໍ່ແຮ່ ໂດຍຂະແໜງການຜະລິດຍັງເປັນແຫລ່ງທີ່ມາຂອງການເຕີບໃຫຍ່ສູງສຸດ 0,86%.