ສະເທືອນໃຈ ! ນັກຮ້ອງສາວຈາກ The Voice Combodia ຖືກຜົວເກົ່າຍິງຕາຍ
ວັນທີ 17 ຕຸລາ, ເວັບໄຊ nokorthomdaily ຂອງກຳປູເຈຍລາຍງານວ່າ: ເມື່ອເວລາປະມານ 16:00 ໂມງ ຂອງວັນທີ 16 ຕຸລາ ເກີດເຫດຄາດຕະກຳຂຶ້ນເມື່ອນາງ ສັນ ສເຣຍໄລ ອາຍຸ 23 ປີ ນັກຮ້ອງຜູ້ໂດ່ງດັງຈາກການເຂົ້າປະກວດລາຍການ The Voice Cambodia ຖືກຍິງເສຍຊີວິດໃນຄລີນິກເສີມຄວາມງາມ Vita Longa ໃນນະຄອນຫລວງພະນົມເປັນ ໃກ້ກັບສະຖານີໂທລະພາບອັບສຣາ ປະເທດກຳປູເຈຍ ໂດຍປາກົດວ່າມືປືນເປັນຜົວເກົ່າຂອງນາງຊື່ທ້າວ ເຊຍ ຣິນ ອາຍຸ 53 ປີ ເປັນເຈົ້າໜ້າທີ່ພາສີ ຢູ່ແຂວງຕະໂບງມຸມ ຜົວເກົ່າຂອງນາງ ສັນ. ພາບຈາກກ້ອງວົງຈອນປິດ ແລະ ຜູ້ເຫັນເຫດການລະບຸວ່າ: ນາງ ສັນ ເດີນທາງມາຄລີນິກເພື່ອກວດຜິວ ໃນລະຫວ່າງທີ່ນາງກຳລັງຍ່າງເຂົ້າໄປໃນຮ້ານ, ອະດີດຜົວ ເຊິ່ງຂັບລົດຈັກຮອນດ້າດຣີມ ໄດ້ໃຊ້ປືນຍິງນາງ ສັນ ສາມນັດ ແລະ ຍິງຕົວເອງຕາຍຕາມ.
ຂໍ້ມູນຈາກເວັບໄຊດັ່ງກ່າວ ລະບຸວ່າ: ນາງ ສັນ ແລະ ອະດີດຜົວ ມີລູກນຳກັນສອງຄົນ ອາຍຸ 4 ປີ ແລະ 7 ປີ ກ່ອນທັງສອງຈະແຍກທາງກັນ ໂດຍໃນປີ 2016 ນາງ ສັນ ມີຊື່ສຽງຈາກການເຂົ້າປະກວດລາຍການເດິວອຍ ກຳປູເຈຍ ໂດຍນາງຜ່ານເຂົ້າຮອບ ແລະ ເຖິງວ່ານາງຈະບໍ່ສາມາດໄດ້ຮັບໄຊຊະນະ, ແຕ່ນາງໄດ້ກາຍເປັນດາລາຜູ້ມີຊື່ສຽງ ທັງຍັງມີໂອກາດໄດ້ເຂົ້າສັງກັດບໍລິສັດບັນເທີງ ແລະ ມີໂອກາດໄດ້ຮັບບົດນັກສະແດງອີກດ້ວຍ.
