IMF ຄາດຄະເນເສດຖະກິດພາກພື້ນອາຊີປາຊີຟິກເຕີບໃຫຍ່ 4,5% ໃນປີ 2024
ສໍານັກຂ່າວຊິນຮົວລາຍງານວ່າ: ເມື່ອບໍ່ດົນມານີ້, ກອງທຶນການເງິນສາກົນ (IMF) ເປີດເຜີຍໂຕເລດຄາດຄະເນການເຕີບໃຫຍ່ຂອງພາກພື້ນອາຊີປາຊີຟິກໃນປີ 2024 ຈະຢູ່ລະດັບ 4,5% ເຊິ່ງຫລຸດລົງຈາກການເຕີບໃຫຍ່ 5% ໃນປີ 2023.
ລາຍງານ “ທ່າອ່ຽງເສດຖະກິດລະດັບພາກພື້ນອາຊີປາຊີຟິກ” ຂອງກອງທຶນການເງິນສາກົນ ວັນທີ 30 ເມສາຜ່ານມາ ລະບຸວ່າ: ອາຊີປາຊີຟິກຈະຍັງເປັນພາກພື້ນທີ່ມີພະລັງຫລາຍທີ່ສຸດໃນໂລກ ແລະ ມີສ່ວນສົ່ງເສີມການເຕີບໃຫຍ່ທົ່ວໂລກປະມານ 60% ໃນປີ 2024.
IMF ຊີ້ວ່າ: ອາຊີປາຊີຟິກໂອບຮັບຕົວຂັບເຄື່ອນການເຕີບໃຫຍ່ທີ່ຫລາກຫລາຍ ນັບແຕ່ການບໍລິໂພກພາຍໃນປະເທດທີ່ແຂງແກ່ນໃນປະເທດອາຊຽນສ່ວນໃຫຍ່ຈົນເຖິງການຟື້ນຕົວຢ່າງວ່ອງໄວຂອງການທ່ອງທ່ຽວໃນຫລາຍປະເທດໝູ່ເກາະປາຊີຟິກ.
ປັດຈຸບັນຄວາມສ່ຽງໄລຍະໃກ້ຂອງອາຊີປາຊີຟິກຢູ່ໃນຈຸດສົມດູນ ໂດຍສະພາບເງິນເຟີ້ຫລຸດລົງ ແລະ ທ່າອ່ຽງດໍາເນີນນະໂຍບາຍການເງິນແບບຫລຸດຜ່ອນໄວຂຶ້ນຊ່ວຍເພີ່ມຄວາມເປັນໄປໄດ້ຂອງການຄວບຄຸມເງິນເຟີ້ໂດຍບໍ່ເຮັດໃຫ້ເສດຖະກິດຂະຫຍາຍຕົວຊ້າ (soft landing).
ການເຕີບໃຫຍ່ທີ່ແຂງແກ່ນເກີນຄາດຢູ່ເອີຣົບ ແລະ ອາເມລິກາ ຈະຊ່ວຍກຸ່ມຜູ້ສົ່ງອອກໃນອາຊີເຕີບໃຫຍ່. ຂະນະທີ່ການກະຈາຍຕົວທາງເສດຖະສາດ ແລະ ຄວາມເຄັ່ງຕຶງທາງພູມສາດທີ່ເພີ່ມຂຶ້ນຍັງເປັນໄພສ່ຽງຂາລົງຮຸນແຮງຕໍ່ການເຕີບໃຫຍ່ໄລຍະກາງຂອງອາຊີປາຊີຟິກ.
