ໄຟໄໝ້ລາມປ່າສະຫງວນ ຢູ່ເມືອງນໍ້າບາກ ເສຍຫາຍ 20 ກວ່າເຮັກຕາ

ເຫດການໄຟໄໝ້ລາມປ່າຢູ່ບ້ານນາຍາງໃຕ້ ເມືອງນໍ້າບາກ ແຂວງຫຼວງພະບາງ ທີ່ເກີດຂຶ້ນໃນວັນທີ 28 ເມສາ ຜ່ານມາ ສາເຫດເນື່ອງຈາກປະຊາຊົນທີ່ຖາງປ່າເພື່ອເຮັດສວນ ຢູ່ໃກ້ກັບຂອບເຂດປ່າສະຫງວນຂອງບ້ານ ດ້ວຍຄວາມຂາດສະຕິ ບໍ່ເຮັດແລວປ້ອງກັນໄຟ ເຮັດໃຫ້ສ້າງຄວາມເສຍຫາຍກັບພື້ນທີ່ປ່າສະຫງວນຂອງບ້ານຫຼາຍກວ່າ 20 ເຮັກຕາ.

ທ່ານ ບຸນທັນ ຈັນທະສັກ ຮອງເຈົ້າເມືອງນ້ຳບາກ ໄດ້ໃຫ້ສຳພາດຕໍ່ນັກຂ່າວວິທະຍຸແຂວງຫຼວງພະບາງ ໃນວັນທີ 1 ພຶດສະພາ 2024 ນີ້ ວ່າ: ພາຍຫຼັງເກີດເຫດໄຟໄໝ້ ປະຊາຊົນທີ່ຖາງປ່ານັ້ນໄດ້ເຂົ້າໄປແຈ້ງຕໍ່ການ ຈັດຕັ້ງບ້ານ ເພື່ອເຂົ້າຊ່ວຍດັບມອດໄຟທີ່ກຳລັງລຸກໄໝ້, ແຕ່ເບື້ອງຕົ້ນແມ່ນບໍ່ສາມາດດັບມອດໄດ້ ຈາກນັ້ນໄດ້ມີການວາງແຜນການເຂົ້າດັບມອດແຕ່ລະຈຸດຈົນສາມາດດັບມອດໄດ້ຕາມແຜນ ການ, ປັດຈຸບັນສາມາດດັບມອດໄດ້ແລ້ວ ແລະ ອົງການປົກຄອງເມືອງ ໄດ້ແຈ້ງໃຫ້ແຕ່ລະບ້ານສືບຕໍ່ເຝົ້າລະວັງຢູ່ແຕ່ລະຈຸດຕື່ມ ເພື່ອບໍ່ໃຫ້ເກີດໄຟລຸກລາມຂື້ນອີກ, ສຳລັບມາດຕະການຕໍ່ຜູ້ກະທຳຜິດ ອົງການປົກຄອງເມືອງ ໄດ້ຊີ້ນຳໃຫ້ພາກສ່ວນກ່ຽວຂ້ອງ ນຳເອົາຜູ້ກ່ຽວເຂົ້າສຶກສາອົບຮົມ ແລະດຳເນີນການປະຕິບັດໂທດຕາມລະບຽບກົດໝາຍ.ດັ່ງນັ້ນ,ຈຶ່ງຮຽກຮ້ອງໃຫ້ປະຊາຊົນພາຍໃນເມືອງນ້ຳບາກ ພ້ອມກັນມີສະຕິໃນການດຳລົງຊີວິດ ໂດຍສະເພາະການຖາງປ່າເພື່ອເຮັດສວນ ເນື່ອງຈາກໄລຍະນີ້ ເປັນໄລຍະທີ່ມີອາກາດຮ້ອນອົບເອົ້າ ອັນຈະເຮັດໃຫ້ເກີດໄຟໄໝ້ລາມປ່າໄດ້ງ່າຍ.