ລັດຖະບານຕາລີບັນເຂົ້າຮ່ວມການເຈລະຈາສະພາບອາກາດເປັນຄັ້ງທໍາອິດ

     ລັດຖະບານຕາລີບັນເຂົ້າຮ່ວມການເຈລະຈາກັບສະຫະປະຊາຊາດ (UN), ຜູ້ບໍລິຈາກ ແລະ ອົງກອນອິດສະຫລະ (NGO) ເປັນຄັ້ງທໍາອິດ ບັນຫາກ່ຽວກັບຜົນກະທົບຂອງການປ່ຽນແປງສະພາບອາກາດຢູ່ອັບການິດສະຖານ.

     ວັນທີ 25 ເມສາ, ສໍານັກຂ່າວຕ່າງປະເທດລາຍງານວ່າ: ພາຍຫລັງສົງຄາມທີ່ຍາວນານ 40 ປີ ອັບການິດສະຖານຖືກຈັດອັນດັບໃຫ້ເປັນໜຶ່ງໃນປະເທດທີ່ມີການກຽມພ້ອມໜ້ອຍທີ່ສຸດໃນການຜະເຊີນການປ່ຽນແປງສະພາບອາກາດ ເຊິ່ງເຮັດໃຫ້ເກີດສະພາບອາກາດສຸດຂົ້ວ ແລະ ສະພາບແວດລ້ອມທາງທໍາມະຊາດທີ່ປ່ຽນແປງ.

       ນອກຈາກນີ້, ການຊ່ວຍເຫລືອຈາກຕ່າງປະເທດທີ່ມອບໃຫ້ອັບການິດສະຖານຫລຸດລົງ ນັບແຕ່ຕາລີບັນກັບຄືນສູ່ອໍານາດໃນປີ 2021 ເນື່ອງຈາກຜູ້ບໍລິຈາກຫລາຍແຫ່ງລະມັດລະວັງການສະໜັບສະໜູນລັດຖະບານທີ່ບໍ່ໄດ້ຮັບການຮັບຮອງ ສົ່ງຜົນເຮັດໃຫ້ຊຸມຊົນທີ່ທຸກຍາກ ແລະ ເບາະບາງຕໍ່ສະພາບອາກາດ ໄດ້ຮັບຜົນກະທົບເພີ່ມຂຶ້ນ.

      ທ່ານ ແຕເຢ ວັດເທີດາລ ຜູ້ອໍານວຍການຄະນະກໍາມະການອັບການິດສະຖານແຫ່ງນໍເວ (NAC) ປະຈໍາອັບການິດສະຖານ ກ່າວຕໍ່ນັກຂ່າວຢູ່ນະຄອນຫລວງກາບູນວ່າ: NAC ເປັນເຈົ້າພາບຮ່ວມຂອງກອງປະຊຸມ 3 ວັນ ເຊິ່ງສິ້ນສຸດໃນວັນທີ 23 ເມສາຜ່ານມາ ແລະ ນີ້ເປັນຄັ້ງທໍາອິດທີ່ເຈົ້າໜ້າທີ່ຕາລີບັນເຂົ້າຮ່ວມກອງປະຊຸມຄູ່ຂະໜານ ທັງແບບພົບປະ ແລະ ອອນລາຍ ກັບກຸ່ມເຈົ້າໜ້າທີ່ໃນປະເທດຕາເວັນຕົກ ນັບແຕ່ການປ່ຽນລັດຖະບານອັບການິດສະຖານ ໃນເດືອນສິງຫາ 2021.

      ທັງນີ້, ຜູ້ເຂົ້າຮ່ວມການເຈລະຈາດັ່ງກ່າວ ມີມະຫາວິທະຍາໄລ, ນັກການທູດ, ໜ່ວຍງານຂອງ UN, ຜູ້ບໍລິຈາກ ແລະ ສະມາຊິກຂອງອັບການິດສະຖານ ເຊິ່ງທຸກຝ່າຍເຫັນພ້ອມວ່າ: ຈໍາເປັນຕ້ອງມີການດໍາເນີນງານລະດັບບຸກຄົນ ແລະ ການດໍາເນີນງານຮ່ວມທັງພາຍໃນ ແລະ ນອກອັບການິດສະຖານ.

      ທ່ານ ໄຊນຸລ ອາບິດີນ ອາບິດ ຮອງຜູ້ອໍານວຍການສໍານັກງານປົກປ້ອງສິ່ງແວດລ້ອມແຫ່ງຊາດຂອງອັບການິດສະຖານ ກ່າວວ່າ: ການຮັບມືການປ່ຽນແປງສະພາບອາກາດ ເປັນສິ່ງສໍາຄັນອັນດັບທໍາອິດ ພ້ອມຮຽກຮ້ອງໃຫ້ໜ່ວຍງານ UN ທີ່ກ່ຽວຂ້ອງທຸກແຫ່ງ ຫລີກເວັ້ນການໃຊ້ສະໂລແກນ ແລະ ດໍາເນີນງານຕາມຂັ້ນຕອນທາງປະຕິບັດ ລວມທັງປົດລັອກເງິນທຶນເພີ່ມອີກສໍາລັບອັບການິດສະຖານ.