ອິດສະລາແອນຢືນຢັນ ບໍ່ກ່ຽວຂ້ອງນໍາເຫດການ ສຸສານໝູ່ 300 ກວ່າສົບ ຢູ່ໂຮງໝໍໃນກາຊາ
ຝ່າຍຄວາມໝັ້ນຄົງຂອງອິດສະລາແອນຢືນຢັນ “ບໍ່ມີສ່ວນກ່ຽວຂ້ອງ” ຕໍ່ການຄົ້ນພົບສຸສານໝູ່ຫລາຍກວ່າ 300 ຄົນ ພາຍໃນໂຮງໝໍຂະໜາດໃຫຍ່ ທາງຕອນໃຕ້ຂອງເຂດກາຊາ.
ວັນທີ 24 ເມສາ, ສໍານັກຂ່າວຕ່າງປະເທດລາຍງານວ່າ: ກອງທັບອິດສະລາແອນອອກຖະແຫລງການວ່າ: ສົບຜູ້ເສຍຊີວິດເກືອບ 340 ຄົນ ທີ່ມີການຝັງລວມກັນເປັນສຸສານໝູ່ຢູ່ພາຍໃນພື້ນທີ່ຂອງໂຮງໝໍນາສເຊີ ເຊິ່ງເປັນໜຶ່ງໃນໂຮງໝໍຂະໜາດໃຫຍ່ທີ່ສຸດ ຕັ້ງຢູ່ເມືອງຂ່ານ ຢູນິສ ທາງຕອນໃຕ້ຂອງເຂດກາຊາ “ບໍ່ມີສ່ວນກ່ຽວຂ້ອງໃນທາງໃດ” ຕໍ່ຝ່າຍຄວາມໝັ້ນຄົງຂອງອິດສະລາແອນ.
ກອງທັບອິດສະລາແອນຢືນຢັນວ່າ: ຊາວປາແລັສຕິນເປັນຜູ້ຝັງສົບແຕ່ລະສົບເອງ. ເຖິງຢ່າງໃດກໍຕາມ, ໃນລະຫວ່າງທີ່ມີການປະຕິບັດທາງທະຫານຢູ່ໂຮງໝໍນາສເຊີ ທະຫານອິດສະລາແອນຈໍາເປັນຕ້ອງຊັນນະສູດສົບບາງສົບ ເພື່ອຄົ້ນຫາເບາະແສກ່ຽວກັບຕົວປະກັນ ໂດຍການຊັນນະສູດເປັນໄປຢ່າງລະມັດລະວັງຕາມຂັ້ນຕອນ ແລະ ໃຫ້ກຽດຜູ້ເສຍຊີວິດທຸກຄົນ, ເມື່ອສໍາເລັດ ແລະ ປາກົດວ່າ: ສົບນັ້ນບໍ່ແມ່ນບຸກຄົນທີ່ທະຫານອິດສະລາແອນກໍາລັງຊອກຫາ ເຈົ້າໜ້າທີ່ຝັງສົບກັບຄືນໃຫ້ເປັນຢ່າງດີ.
ກອງທັບອິດສະລາແອນປະຕິບັດການທາງທະຫານຄັ້ງໃຫຍ່ຢູ່ໂຮງໝໍນາສເຊີໃນທ້າຍເດືອນກຸມພາຜ່ານມາ ເນື່ອງຈາກເຊື່ອໝັ້ນວ່າ: ກຸ່ມຮາມັດໃຊ້ໂຮງໝໍແຫ່ງນີ້ເປັນຖານປະຕິບັດການທາງທະຫານ, ແຕ່ກຸ່ມຮາມັດຍັງຢືນຢັນປະຕິເສດ. ຂະນະທີ່ສະຫະປະຊາຊາດ (UN) ຮຽກຮ້ອງໃຫ້ມີການສືບສວນສອບສວນ “ຢ່າງໂປ່ງໃສ” ກ່ຽວກັບສຸສານໝູ່ຢູ່ໂຮງໝໍນາສເຊີ.
