ອິນເດຍເລີ່ມການເລືອກຕັ້ງທົ່ວໄປ ທ່ານ ໂມດີ ກຽມຄວ້າໄຊຊະນະສາມສະໄໝຊ້ອນ

     ການເລືອກຕັ້ງທົ່ວໄປຂອງອິນເດຍເລີ່ມຂຶ້ນຢ່າງເປັນທາງການ ໂດຍຈະເປັນແບບມາລາທອນຮອດຕົ້ນເດືອນມິຖຸນານີ້ ແລະ ເກືອບທຸກຝ່າຍຄາດຄະເນໄປໃນທາງດຽວກັນວ່າ: ນາຍົກລັດຖະມົນຕີ ນາເຣນທຣາ ໂມດີ ຈະຄອງຕໍາແໜ່ງເປັນສະໄໝທີສາມຕິດຕໍ່ກັນ.

     ວັນທີ 19 ເມສາ, ສໍານັກຂ່າວຕ່າງປະເທດລາຍງານວ່າ: ການເລືອກຕັ້ງທົ່ວໄປຂອງອິນເດຍ ເຊິ່ງຈັດແບບມາລາທອນ ໂດຍຈະເປັນການທະຍອຍລົງຄະແນນຕາມພາກພື້ນເລີ່ມຂຶ້ນແລ້ວໃນວັນທີ 19 ເມສານີ້ ເປັນການເລືອກຕັ້ງສະມາຊິກຊຸດໃໝ່ 543 ບ່ອນນັ່ງຂອງສະພາ ແລະ ພັກການເມືອງຕ້ອງໄດ້ຮັບເລືອກຕັ້ງຢ່າງໜ້ອຍ 272 ບ່ອນນັ່ງ ເພື່ອຄອງສຽງສ່ວນຫລາຍພຽງພັກດຽວໃນສະພາ.

      ສໍາລັບການລົງຄະແນນຫລັງຈາກນັ້ນຈະເກີດຂຶ້ນໃນວັນທີ 26 ເມສາ, 7 ພຶດສະພາ, 13 ພຶດສະພາ, 20 ພຶດສະພາ, 25 ພຶດສະພາ ແລະ 1 ມິຖຸນາ. ສ່ວນການນັບຄະແນນຈະເລີ່ມໃນວັນທີ 4 ມິຖຸນານີ້ ຂະນະທີ່ຈໍານວນຜູ້ມີສິດອອກສຽງມີປະມານ 968 ລ້ານຄົນ ຖືເປັນການເລືອກຕັ້ງທົ່ວໄປຕາມລະບອບປະຊາທິປະໄຕຄັ້ງໃຫຍ່ທີ່ສຸດຂອງໂລກ.

      ການເລືອກຕັ້ງຄັ້ງນີ້ ເຊິ່ງເປັນການລົງຄະແນນຕາມກໍານົດ ແລະ ຍັງເປັນການແຂ່ງຂັນລະຫວ່າງພັກພາຣະຕິຢະ ຊົນຕະ (BJP) ຂອງນາຍົກລັດຖະມົນຕີ ນາເຣນທຣາ ໂມດີ ເຊິ່ງດໍາລົງຕໍາແໜ່ງນາຍົກລັດຖະມົນຕີນັບແຕ່ປີ 2014 ແລະ ນໍາພາພັກ BJP ຊະນະການເລືອກຕັ້ງຄັ້ງຫລ້າສຸດ ໃນປີ 2019 ໄດ້ 303 ບ່ອນນັ່ງ.

      ສ່ວນພັກຄອງເກຣສ ນໍາໂດຍທ່ານ ຣາຫຸລ ຄານທີ ໄດ້ຮັບການເລືອກຕັ້ງພຽງ 52 ບ່ອນນັ່ງ ຈາກການເລືອກຕັ້ງເມື່ອ 5 ປີກ່ອນ.

     ທັງນີ້, ທ່ານ ໂມດີ ຢືນຢັນການເດີນໜ້າພັດທະນາໂຄງລ່າງພື້ນຖານ, ນະໂຍບາຍປະຊານິຍົມ ລວມທັງການທຸ້ມງົບປະມານອຸດໜູນຫລາຍໂຄງການ ແລະ ເພີ່ມການສະໜັບສະໜູນໃຫ້ກຸ່ມຄົນລຸ້ນໃໝ່ທີ່ຍັງຂາດໂອກາດ ແລະ ການຊ່ວຍເຫລືອກະສິກໍາ.