ເສດຖະກິດສິງກະໂປເຕີບໃຫຍ່ 2,7% ໃນໄຕມາດທໍາອິດ

      ກະຊວງການຄ້າ ແລະ ອຸດສາຫະກໍາຂອງສິງກະໂປ ເປີດເຜີຍຕົວເລກຄາດຄະເນການເຕີບໃຫຍ່ຂອງເສດຖະກິດສິງກະໂປໃນໄຕມາດທໍາອິດ (ມັງກອນ-ມີນາ) ຂອງປີນີ້ຢູ່ລະດັບ 2,7% ເມື່ອທຽບໃສ່ປີຕໍ່ປີ ເຊິ່ງຫລາຍກວ່າການເຕີບໃຫຍ່ 2,2% ໃນໄຕມາດສຸດທ້າຍ (ຕຸລາ-ທັນວາ) ຂອງປີກ່ອນ.

     ລາຍງານລະບຸວ່າ: ການເຕີບໃຫຍ່ຂອງຂະແໜງການຜະລິດໃນໄຕມາດທໍາອິດຂອງປີນີ້ຢູ່ລະດັບ 0,8% ເມື່ອທຽບໃສ່ປີຕໍ່ປີ ຫລຸດລົງຈາກການເຕີບໃຫຍ່ 1,4% ໃນໄຕມາດສຸດທ້າຍຂອງປີກ່ອນ ໂດຍການຜະລິດທີ່ເພີ່ມຂຶ້ນໃນກຸ່ມເຄມີ, ວິສະວະກໍາພຣີຊິຊັນ ແລະ ວິສະວະກໍາການຂົນສົ່ງ ໄດ້ຊົດເຊີຍການຜະລິດທີ່ຫລຸດລົງໃນກຸ່ມເອເລັກໂຕຣນິກ, ການຜະລິດທາງຊີວະການແພດ ແລະ ການຜະລິດທົ່ວໄປ.

     ສ່ວນການເຕີບໃຫຍ່ຂອງຂະແໜງກໍ່ສ້າງ ເຊິ່ງມີແຮງໜູນຈາກການຜະລິດຂອງການກໍ່ສ້າງສາທາລະນະ ໃນໄຕມາດທໍາອິດຂອງປີນີ້ຢູ່ລະດັບ 4,3% ເມື່ອທຽບໃສ່ປີຕໍ່ປີ, ສ່ວນການເຕີບໃຫຍ່ຂອງຂະແໜງບໍລິການໃນໄຕມາດທໍາອິດຂອງປີນີ້ຢູ່ລະດັບ 3,2 ເພີ່ມຂຶ້ນຈາກ 2,3% ໃນໄຕມາດສຸດທ້າຍຂອງປີກ່ອນ.