ປີ 2023 ແຂວງໄຊສົມບູນ ກວດພົບການສໍ້ລາດບັງຫລວງ 2 ຄົນ ພ້ອມປະຕິບັດວິໄນ 1 ເປົ້າໝາຍ
ວັນທີ 9 ເມສາ 2024, ແຂວງໄຊສົມບູນ ໄດ້ຈັດກອງປະຊຸມ ວຽກງານກວດກາ ທົ່ວແຂວງ ປະຈໍາປີ 2023 ແລະ ກໍານົດທິດທາງແຜນການປະຈໍາປີ 2024, ເປັນປະທານຂອງທ່ານ ພອຍຄໍາ ຮຸ່ງບຸນຍວງ ເຈົ້າແຂວງໄຊສົມບູນ.
ກອງປະຊຸມໄດ້ຟັງລາຍງານວ່າ: ໄລຍະ 1 ປີຜ່ານມາ ຄະນະກວດກາພັກ ແລະ ອົງການກວດກາ ລັດ ແລະ ຕ້ານການສໍ້ລາດບັງຫລວງ ໄດ້ຕິດຕາມ, ກວດກາການຄຸ້ມຄອງ-ບໍລິຫານລັດ ໂດຍຮູບການກວດກາປົກກະຕິ ຂອງອົງການປົກຄອງແຂວງ ແລະ 5 ເມືອງ. ໃນນີ້ໄດ້ຕິດຕາມ, ກວດກາໂຄງການລົງທຶນຂອງລັດເລີ່ມແຕ່ຫົວທີ ໄດ້ທັງໝົດ 12 ໂຄງການ, ກວດກາຮ່ວມກັບອົງການກວດກາແຫ່ງລັດ 2 ໂຄງການ, ກວດກາຮ່ວມກັບກະຊວງແຜນການ ແລະ ການລົງທຶນ 1 ໂຄງການ ແລະ ໂຄງການທີ່ແຂວງ ກໍານົດໄດ້ 9 ໂຄງການ.
ນອກນັ້ນໄດ້ດໍາເນີນການສືບສວນ-ສອບສວນພະນັກງານ-ລັດຖະກອນ ທີ່ມີພຶດຕິກໍາສໍ້ລາດບັງຫລວງ ທົ່ວແຂວງ 1 ກໍລະນີ, ມີ 2 ຄົນ, ໄດ້ຄົ້ນຄວ້າແກ້ໄຂທາງດ້ານບໍລິຫານ ຈໍານວນ 2 ຄົນ ປະຕິບັດວິໄນຂັ້ນ 3, ໄດ້ຄົ້ນຄວ້າແກ້ໄຂຄໍາຮ້ອງ-ຄໍາສະເໜີ 9 ສະບັບ ເຊິ່ງພົວພັນເຖິງການປະຕິບັດໜ້າທີ່ຂອງພະນັກງານລັດ ແລະ ຜູ້ປະກອບການ 29 ຄົນ, ໃນນັ້ນຂົງເຂດການເມືອງ 10 ຄົນ, ຂົງເຂດວັດທະນະທໍາ-ສັງຄົມ 6 ຄົນ, ຂົງເຂດເສດຖະກິດ 2 ຄົນ, ຂົງເຂດປ້ອງກັນຄວາມສະຫງົບ 6 ຄົນ, ຜູ້ປະກອບການ ແລະ ປະຊາຊົນ 5 ຄົນ, ໄດ້ຕິດຕາມການແກ້ໄຂຜົນຂອງການປະຕິບັດວິໄນຕໍ່ພະນັກງານລັດຖະກອນ 2 ເປົ້າໝາຍ, ຍິງ 1 ເປົ້າໝາຍ ປະຕິບັດວິໄນແລ້ວ 1 ເປົ້າໝາຍ ຮູບການວິໄນແມ່ນລຶບຊື່ອອກຈາກລັດຖະກອນ ເຫດຜົນຍ້ອນປະລະໜ້າທີ່ ແລະ 1 ເປົ້າໝາຍ ຍັງຢູ່ໃນຂັ້ນຕອນການຄົ້ນຄວ້າປະຕິບັດວິໄນ.
