ຢຶດຄຳທີ່ລັກລອບສົ່ງອອກ ເຊິ່ງເປັນຄະດີໃຫຍ່ທີ່ສຸດ ຂອງກົມພາສີ ຮົງກົງ
ສຳນັກຂ່າວຕ່າງປະເທດລາຍງານເມື່ອວັນທີ 9 ເມສາ 2024 ວ່າ: ກົມພາສີ ຮົງກົງຈີນ ຖະແຫລງວ່າຄຳທີ່ລັກລອບສົ່ງອອກຖືກຫລອມເປັນຊິ້ນສ່ວນຕ່າງໆເຊັ່ນ: ແກນມໍເຕີ, ສະກູ ແລະ ເກຍ ຖືກກວດພົບເມື່ອເດືອນທີ່ແລ້ວ ໃນເຄື່ອງປ້ຳລົມ 2 ເຄື່ອງ ທີ່ເປັນສິນຄ້າສົ່ງອອກທາງອາກາດ ຈາກຮົງກົງຈີນໄປຍັງປະເທດຍີ່ປຸ່ນ ແລະ ຄາດວ່າມີນ້ຳໜັກລວມ 146 ກິໂລກຣາມ ມູນຄ່າປະມານ 84 ລ້ານໂດລາຮົງກົງ ຫລື ປະມານ 261,6 ຕື້ກີບ.
ທ່ານ ຫລິວ ອີ້ຫລົງ ຮັກສາການຫົວໜ້າສຳນັກງານອາຊະຍາກຳ ຂອງກົມພາສີຮົງກົງກ່າວວ່າ: ນີ້ເປັນຄະດີການລັກລອບຂົນຄຳທີ່ໃຫຍ່ທີ່ສຸດ ໃນບັນທຶກຂອງກົມພາສີຮົງກົງ, ເຊິ່ງໃນກໍລະນີນີ້ ກຸ່ມອາຊະຍາກຳທີ່ກໍ່ເຫດໄດ້ລະດົມສະໝອງ ເພື່ອໃຊ້ປະໂຫຍດຈາກພື້ນທີ່ ແລະ ໂຄງສ້າງຂອງເຄື່ອງປ້ຳລົມໃນການເຊື່ອງຄຳ ແຕ່ຍ້ອນນ້ຳໜັກທີ່ໜັກກວ່າປົກກະຕິ ເຮັດໃຫ້ພະນັກງານກວດສອບຂອງກົມພາສີ ມີຄວາມສົງໄສຈຶ່ງໄດ້ກວດສອບ ແລະ ຢຶດຂອງກາງທີ່ເປັນຄຳໄວ້.
ຕໍ່ມາເຈົ້າໜ້າທີ່ໄດ້ຈັບກຸມຊາຍຄົນໜຶ່ງອາຍຸ 31 ປີເຊິ່ງເປັນຜູ້ນວຍການບໍລິສັດແຫ່ງໜຶ່ງ ແລະ ໄດ້ປະກັນຕົວໃນເວລາຕໍ່ມາ ແຕ່ທາງການຮົງກົງອາດຈະມີການຈັບກຸມຕົວຜູ້ຕ້ອງສົງໄສເພີ່ມຕື່ມ.
