ກໍາປູເຈຍພົບຜູ້ຕິດເຊື້ອພະຍາດໝາກສຸກລີງເພີ່ມອີກ 3 ຄົນ

     ກະຊວງສາທາລະນະສຸກກໍາປູເຈຍລະບຸໃນຖະແຫລງການ ເຊິ່ງເຜີຍແຜ່ໃນວັນທີ 7 ເມສາວ່າ: ກໍາປູເຈຍກວດພົບຜູ້ຕິດເຊື້ອພະຍາດໝາກສຸກລີງ (monkeypok) ເພີ່ມອີກ 3 ຄົນ ເຮັດໃຫ້ຈໍານວນລວມຂອງຜູ້ຕິດເຊື້ອພະຍາດໝາກສຸກລີງໃນປະເທດມີທັງໝົດ 17 ຄົນແລ້ວ ນັບແຕ່ເດືອນທັນວາ 2023.

     ຂໍ້ມູນຈາກກະຊວງສາທາລະນະສຸກລະບຸວ່າ: ຜູ້ຕິດເຊື້ອທັງໝົດ 17 ຄົນເປັນຜູ້ຊາຍອາຍຸລະຫວ່າງ 20-43 ປີ ແລະ ເກືອບທັງໝົດອາໄສ ແລະ ເຮັດວຽກຢູ່ນະຄອນຫລວງພະນົມເປັນ ໂດຍປັດຈຸບັນມີຜູ້ຕິດເຊື້ອພະຍາດໝາກສຸກລີງຈໍານວນ 5 ຄົນ ທີ່ຍັງປິ່ນປົວຢູ່ໂຮງໝໍ.

     ກະຊວງສາທາລະນະສຸກກໍາປູເຈຍຮຽກຮ້ອງໃຫ້ປະຊາຊົນລະມັດລະວັງເປັນພິເສດ ເພື່ອປ້ອງກັນບໍ່ໃຫ້ເກີດກຸ່ມກ້ອນການລະບາດ ຫລື ການແຜ່ກະຈາຍຂອງພະຍາດໝາກສຸກລີງໃນວົງກວ້າງ. ພ້ອມລະບຸວ່າ: ພະຍາດນີ້ຕິດຕໍ່ກັນຜ່ານການມີເພດສໍາພັນກັບຜູ້ທີ່ຕິດເຊື້ອ ແລະ ຜ່ານການສໍາຜັດໂດຍກົງກັບບາດແຜ, ສານຄັດຫລັ່ງ, ນໍ້າລາຍ ແລະ ສິ່ງຂອງທີ່ປົນເປື້ອນໄວຣັສ.

      ກະຊວງສາທາລະນະສຸກກໍາປູເຈຍກ່າວວ່າ: ຜູ້ທີ່ມີອາການດັ່ງຕໍ່ໄປນີ້ເຊັ່ນ: ຜືນຂຶ້ນ, ມີຕຸ່ມໂພງຕາມໃບໜ້າ, ຝາມື, ຕີນ, ຮ່າງກາຍ, ຕາ, ປາກ ຫລື ອະໄວຍະວະເພດ, ເປັນໄຂ້, ຕ່ອມນໍ້າເຫລືອງໃຫຍ່, ເຈັບຫົວ, ປວດກ້າມຊີ້ນ, ເຈັບຫລັງ, ຮູ້ສຶກອ່ອນເພຍ ຄວນໄປສູນສຸຂະພາບ ຫລື ໂຮງໝໍ ເພື່ອຮັບຄໍາປຶກສາ ຫລື ມີການກວດເຊື້ອ.