ອາເມລິກາປະກາດຖອນຕົວ ອອກຈາກຢູເນສໂກ
ອາເມລິກາປະກາດຖອນຕົວອອກຈາກອົງການຢູເນສໂກ ອ້າງວ່າອົງການນີ້ມີຄະດີຕໍ່ຕ້ານອິດສະລາແອນ ແລະ ຈະຕັ້ງໜ່ວຍງານສັງເກດການຂຶ້ນມາເຮັດໜ້າທີ່ແທນ.
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດສະຫະລັດອາເມລິກາ ໃນວັນທີ 12 ຕຸລາວ່າ: ທ່ານນາງ ຮີເທີ ເນົາເອິດ ໂຄສົກກະຊວງການຕ່າງປະເທດອາເມລິກາ ຖະແຫລງວ່າ: ອາເມລິກາຂໍຖອນຕົວອອກຈາກການເປັນສະມາຊິກຂອງອົງການການສຶກສາ, ວິທະຍາສາດ ແລະ ວັດທະນະທຳແຫ່ງສະຫະປະຊາຊາດ (ຢູເນສໂກ) ໂດຍໃຫ້ມີຜົນບັງຄັບໃຊ້ແຕ່ວັນທີ 31 ທັນວາເປັນຕົ້ນໄປ. ທັງນີ້ ອາເມລິກາກ່າວຫາວ່າ: ອົງການຢູເນສໂກມີຄະດີຕໍ່ຕ້ານອິດສະລາແອນ ແລະ ອາເມລິກາຈະຕັ້ງໜ່ວຍງານສັງເກດການຂຶ້ນມາເຮັດໜ້າທີ່ແທນຕົວແທນຂອງອາເມລິກາໃນອົງການຢູເນສໂກ ເຊິ່ງມີສຳນັກງານຢູ່ນະຄອນຫລວງປາຣີ ປະເທດຝຣັ່ງ.
ອາເມລິກາບໍ່ພໍໃຈ ໃນປີ 2011 ເມື່ອສະມາຊິກຂອງຢູເນສໂກຮັບຮອງປາແລັສຕິນເຂົ້າເປັນສະມາຊິກຂອງຢູເນສໂກ, ເຖິງວ່າຈະມີສຽງຄັດຄ້ານຢ່າງໜັກຈາກອິດສະລາແອນ ເຊິ່ງເປັນພັນທະມິດສຳຄັນຂອງອາເມລິກາກໍຕາມ ແລະ ອາເມລິກາພະຍາຍາມທີ່ຈະຄັດຄ້ານທຸກການເຄື່ອນໄຫວຂອງອົງການໃນສັງກັດສະຫະປະຊາຊາດທີ່ຈະຮັບຮອງປາແລັສຕິນເປັນລັດ ເພາະເຫັນວ່າຄວນຈະຖ້າໃຫ້ບັນລຸຜົນການເຈລະຈາວ່າດ້ວຍຂໍ້ຕົກລົງສັນຕິພາບຕາເວັນອອກກາງ, ແຕ່ລັດຖະບານອາເມລິກາຂອງປະທານາທິບໍດີ ໂດນັນ ທຣຳ ໄດ້ສັ່ງໃຫ້ທົບທວນພັນທະກໍລະນີຫລາຍຝ່າຍ ເພາະຕ້ອງການຈະດຳເນີນຕາມນະໂຍບາຍຕ່າງປະເທດທີ່ໃຫ້ໄວ້ລະຫວ່າງຫາສຽງວ່າ: ອາເມລິກາຕ້ອງມາກ່ອນ.
ໂຄສົກກະຊວງການຕ່າງປະເທດ ກ່າວຢືນຢັນວ່າ: ໄດ້ແຈ້ງໃຫ້ຜູ້ອຳນວຍການອົງການຢູເນສໂກ ອິຣິນາ ໂບໂກວາ ທີ່ພວມຈະພົ້ນຈາກຕຳແໜ່ງຮູ້ເລື່ອງການຕັດສິນໃຈຖອນຕົວຂອງອາເມລິກາອອກຈາກຢູເນສໂກແລ້ວ.
